傳統老字號總係吸引人去試。早一兩日，我就同我朋友阿聯一齊去試一間老牌名餐廳啦。點知一去到，入面嘅格局同廣告完全唔同。侍應畀嘅指示又唔清晰，餐廳提供嘅資訊又不足，食物質素亦都唔理想。出咗餐廳門口，咁又梗係例牌咁評論吓頭先餐飯啦。

我：「啱啱間嘢真係唔得喎，仲話係咩老字號。侍應服務同食物嘅質素都唔好，咁都可以仲有咁多人支持。」

聯：「乜你好想幫襯大財團咩？唔係嘅就唔好再鬧啦。」

我：「間老店反大財團就唔鬧得？間嘢做得唔好我就要出聲架啦。佢作為一間小店係有同情分，但唔代表咁我就要咩都話好食。好食就讚，唔好食就屌。咁做有咩問題先？今日佢煮得唔好我鬧佢。他日佢有新菜式我再來食嗰陣唔代表我唔會讚佢，一單還一單架。你成日講咩理性咩對事不對人，做咩今次又咁對人不對事，一講到呢間餐廳就一定要支持要鼓勵，連少少異見都容納唔到呢？」

食客嚟得一間餐廳，就一定有佢本身嘅期望。如果我唔係相信緊餐廳會煮到美食，我又點會專登嚟食呢？唔通我故意想搵啲難食嘅食物來虐待自己咩？我要自虐駛乜咁麻煩，跪地苦行或者搵雞蛋掟自己咪得，仲可以呃埋掌聲添。相反，一旦食物質素唔好，食客對廚師就一定不滿架啦。點解有啲餐廳會拍烏蠅無咩人幫襯，咪就係因為無人相信佢哋可以煮到美食。

聯：「唔好嘈啦，人哋做咗咁多年都唔執就總有道理。佢幾年前咪做得幾好，嗰陣你都有讚架。」

我：「但佢今次真係做得差呀，邊可以拎過往嘅功績出嚟做免死金牌架。如果話之前做得好就唔鬧得，梁振英都支持過89學運啦，唔通而家又唔鬧得佢，而事實上，點解間嘢會愈做愈差？咪又係因為你呢種盲撐嘅心態。如果佢做得好你又接受，做得唔好你又接受，咁佢仲有必要做咁好咩？只要一日無新嘅小店，佢就可以用反大財團來做口號不停拉客，你覺得佢仲會力求進步咩？」

開餐廳理應係殘酷架。煮得唔好嘅就會比人慢慢取代。正正因為佢哋面對著可能無人幫襯嘅壓力，咁先會保持水準不停自強。相反，如果班廚師煮得差嗰陣都仲有咁多顧客幫襯，佢哋只會變到不思進取。咁唔係咩陰謀論，而係對人性合理嘅推斷。同樣，咩身份立場，都唔可以成為大廚煮得差嗰陣嘅籍口。如果話個大廚係學生就要包容，唔可以鬧佢煮得差，咁佢仲開咩餐廳呢？返去玩煮飯仔啦。學生係對自己無信心咪去參加少年廚神大賽，但當一踏入咗成人嘅競技場，就唔好再要求人哋當你只係普通學生咁睇。

係好食就好食，難食就難食。但如果因為某啲其他因素，就要對間餐廳特別寬容，難食都要話好食。咁咪即係好多人口中最不屑嘅指鹿為馬？喺呢種光環霸權底下，我連如實表達自己意見都唔得，咁算係乜嘢自由。一定要所有人都來支持同一間餐廳又叫咩民主呢？每個人都有選擇自己想食咩嘅權利，學生都唔一定要食學生餐啦，咁又點解要去封殺人哋自己決定自己想點嘅機會呢？

聯：「老實答我，你係唔係收咗錢？」

我：「梗係有啦。啱啱餐飯加埋一先$320，我畀$500蚊紙就緊係要收返錢啦。唔通畀成$180貼士咁多咩？咪住先，你做咩咁問。即係我最近就比較手緊，無多餘錢可以借比人。不過我就真係當你朋友，你有需要我幫手我就一定幫。情與義，值千金！~~~」

聯：「唔係同你講笑呀。你唔係收咗啲大財團錢點解要話間老店唔好，自己人點會咁做。你唔好再搞分化搞破壞啦。」

我：「唔支持你就一定係支持大財團架咩？呢個世界唔係得兩間餐廳架，如果要所有人都幫襯呢間老店，咁又同大集團壟斷有咩分別？要支持小店又好多種方法，唔一定要人揀呢間嫁。唔好當咗支持嘅先係啱，而其他反對聲音就係邪惡啦。」

可惜嘅係，咁嘅偶像主義並唔罕見。喺呢種諗法底下，佢哋會輕易將世界分咗做兩部份，支持嘅就係朋友，唔支持就係敵人。呢種二分法極不理性，甚至其實咁嘅諗法先似真正嘅極端法西斯。你諗吓咁樣同種族主義有咩分別？而且而家更有好多人係連事實嘅全部都未了解清楚就去唔俾人哋反對，用主觀嘅角度認為異見者一定係不懷好意，仲有部份會屈人哋係被收買或者俾敵對勢力入侵。咁又何來理性呢？

我真係完全估唔到，「命運自決」嘅第一關竟然係咁。