梁振英最近就2013-2014施政報告發表，製作了電視廣告，千人一面，只有生硬卡通表情。宣傳片更旋即被本報改配以高登圖代替，頗堪玩味，令人會心一笑 。

現實世界中，689班子的成員，都是面目模糊。但諷刺的是，令人印象深刻的官員，不是因為醜聞纏身，就是因為施政力差。稍為令人有些正面印象的，可能就是現任食物及衞生局局長高永文醫生。他的民望在問責官員中長踞榜首，但看看他施過什麼德政，可能無人答得出。答得出的可能會話﹕「高永文？沙士事件，哭成淚人嗰個呀嘛，之後，佢仲自己請辭添」。

2004年7月，立法會調查沙士專責委員會的報告，點名指摘當時的醫管局主席梁智鴻及署理行政總裁高永文。及後，並非問責官員的梁智鴻，在記者會中宣佈下台，而其身旁的高永文流淚滿面。同年12月，高永文請辭，他公開表示梁智鴻離職也觸動他辭任醫管局行政總裁。

有說，高永文當年雖不是問責官員，但正體現了問責精神。現在成為了問責官員的他，究竟又會怎看問責精神呢？

香港電台《星期五主場》節目於1月11日，邀請他接受訪問，除了討論他對問責精神的看法外，亦問及他就梁振英的誠信問題之意見。



以下為訪問對話節錄（以斜體顯示）︰

主持人（主）：嗰個問責精神究竟係咩嘢呢？

高永文（高）：其實我覺得問責個體現呢，係我地尐人喺嗰個位置或者工作係需要你呀， 還是你需要份工作。以我來講呢，不嬲原則就係話如果嗰個地方需要我做嘢，我就去做，而唔係覺得自己需要個職位而去做。咁所以話做任何一個職位，個職位只係一個工具，係要達到你背後有一個理念。

主：咁即係當時你就話，身為嗰個位置，所以佢地認錯、道歉或者下台係一個體現問責嘅表現？

高：我再講多次。其實佢地唔係因為道歉，而係因為呢個係佢地嘅責任。我自己就因為所謂共同進退，所以離開嘅。

主：點解咁問番呢？因為大家都好懷念嗰個風氣。例如當時你都講到：「若果認為我做得唔好，我可以辭職，或者係醫管局工作可能未達到公眾要求，作為署理行政總裁，願意負最高責任。」睇返依家啦，依家一班問責團隊，你嘅問責團隊成員呢，佢地似乎好多都未乎合公眾期望，以佢地表現。或者，有尐啦，唔係好多。

高：依家嘅情況同當時情況未必可以比較。咁所以我諗，都未必適合我喺呢度評論。

主：咁但係頭先，你講緊體現問責嘅精神呀嘛？咁我就係想問下，例如依家係咪無咗呢種精神，例如有局長有個人失德，又或者，有局長推行政策出現民怨四起，咁呢尐其實都係應該負責嗰喎。喺頭先你講嗰個講法入面。

高：我……我就唔想走入去講嗰個議題。個議題就唔係我負責嘅議題。咁好多時呢，喺個議題呢引起好多唔同嘅意見。如果係咁的話呢，我相信就唔等於當時我地自己無論你自己鍾唔鍾意都好啦，嗰個沙士係我地負責處理嘅，沙士亦都唔係一個人人唔同意見嘅議題來𠺢嘛，而係一個的確令到香港人蒙受一個極大損失嘅問題，所以 我覺得當時嗰個問責，係可以咁樣去諗。但依家，咁可能唔同嘅人睇法有唔同，有尐具體嘅，有人覺得做得好，有尐人覺得唔好，係唔同嘅意見嘅問題呀嘛。我再講多次，具體嘅議題裡面嘅嘢，我亦都唔希望喺呢度講。

主﹕或者，調返轉呀，俾你自己，到你民望跌到負嘅，好似依家有兩位局長佢嘅民望係負嘅，如果你嘅民望跌到咁呢，你嘅政策或者你嘅做法，引起民怨去到嗰個程度時，你會唔會? 你會點做呀?

高﹕我都好明你嘅問題。即係以我自己嘅態度嚟講呢，我自己就唔係睇唔睇邊個嘅民望嘅問題，我任何時間，若果係自己做得唔好嘅，或是呢個職位唔需要我嘅，我隨時都可以走嘅。不過我唔想喺到評論，因為我嘅評論唔係淨係影響我自己，仲會影響其他人。

原來，高永文提到當年問責下台只是「共同進退」，而非自覺失職。其心態會否只是策略性姿態的表現或形象工程多於責任的承擔？這是否才是高官問責制度的真相？


高永文看梁振英的誠信

主：頭先你提到，一尐政治敏感嘅議題你未必需要處理，但係政治敏感嘅嘢你都牽涉其中啦。大家都認定啦，你係「梁粉」，因為係好早階段呢，你就企出來就話支持梁振英、或者認同梁振英、欣賞梁振英。佢選之前就喺咁樣，咁呀呢個身份呢就一直帶到依家，去到佢嘅僭建醜聞呢，其實你都有話一直唔牽涉誠信問題。

高：即係其實你叫我係咪「梁粉」，我唔介意嘅。不過喺之前嚟講呢，我亦都澄清一番呢，喺競選之前，我唔係有好多機會接觸梁生。就算我接觸佢嘅施政理念呢，都係透過媒體。亦都有人話佢選舉工程，甚至佢嘅政綱呢，其實呢尐我全部都無參與。即我都希望大家會睇到其實呢一屆政府， 以梁振英先生為領導呢，其實我諗有幾個局長加入政府嘅最主要嘅原因，並唔係因為佢做過嘅嘢，而係因為佢想為社會基層爭取一尐，就係話，香港持續經濟發展左廿幾年之後基層唔能夠分享到，希望都幫佢爭取多尐社會公義。

高永文仍然落入一種高官苦況「不為外人道」的心態，將一些爭論簡化歸納為以偏概全、偷換概念的聲音。這實在是一種誣陷，和避而不談的取巧方法。

既然聲稱要為市民爭取「社會公義」，又何必避談對梁振英誠信的判斷？假若一切的行為皆可任人理解，那麼高局長在爭取的又算是甚麼「公義」呢？

政府之職能與責任既是為市民大眾服務，則我們關心的不僅僅是個別官員的能力和操守，而更重要是他們到底有沒有向一個具透明度、有效的行政制度好好負責。在香港這樣的一個法治社會，我們堅守、信任和尊重的應是制度而非個人。這並不關乎體諒不體諒的問題，而更多是程序公義之維護與體現。


民望　眼淚　實力

節目尾段，主持人仍追問高永文對梁振英誠信的意見。高永文依然拖拖拉拉，毫無驚喜，不復當年勇。

沙士過後十年，香港公立醫護人員的無私捨己精神，盡忠職守，至今仍刻骨銘心，令人肅然起敬。出身醫生的高永文先生，希望今後你的民望是由你施政有方所支撐，而不是靠男兒淚。嬰兒床位、坑渠油事件、骨灰龕等事件也是你顯實力的機會。

放心吧，只要你做實事，你的民望一定高企， 無人可以威脅你，689只會繼續增添如劉江華般的水兵。因為只有水兵，才不會更突顯689的水皮。


相關連結：
《星期五主場》第4集節目重溫