適逢俞琤退下火線，個個講當年商台，而傲將軍最忘不了的，是廣播劇《黃金少年》系列，故事背景，是一個有異能人、股票炒賣當道的未來世界。而那個未來世界的潮流是甚麼？就是過往七八十年代的舊經典。未來世界沒有新原創，只古老當時興，煲舊CD炒冷飯，音樂圈食老本。

廣播劇首播後快將十年的今天，香港的所謂主流文化何嘗不是炒冷飯食老本？亞視會永遠都全在但冇人睇，所有影視娛樂由CCTVB一台獨大話曬事：
音樂節目用極都是汪阿姐為你倒咖啡，三十年來，始終走音，多難得，才有一個坤哥涯出頭；
選美標準還是甚麼美貌與智慧並重，唔討好的十A？大台理得你；
劇集口味適合廿年前的少女，嗯，橋唔怕舊，爭產三角戀BBQ煮個麵你食可以拍到2046，想睇好野？有！當年套《大時代》啦；
到班「網絡紅人」上去挑機喇，叻哥王晶肥媽撲出嚟殺子，咩後生仔搞搞震呀叔當年努力就買到樓的老屎忽嘴臉傾巢而出。
最後都係一句：細路你番去收皮啦，我地一成不變啲觀眾都受㗎。

再望望戲院，合拍片啱唔啱口味？
唔啱？有葉念琛MK大導演，將偷食、悔過、復合再高明點偷食、女主角叫呀寶的愛情片啪啪啪拍足十年；
再唔係見《狂舞派》成功，齊齊講本土講夢想，等陣，年輕人想講夢想？行開啲啦，____！有資格問《哪一天我們也會飛》的，是林海峰楊千嬅，慢慢重溫舊夢，新一代？你望吓游學修、蘇麗珊、吳肇軒在Poster中有幾大先講啦。

到賀歲片、笑片，九十年代卡士有：
吳君如、王晶、呀叻、梁家輝、黃百鳴、谷德昭、曾志偉、周星馳；
千禧年代卡士有：
吳君如、王晶、呀叻、梁家輝、黃百鳴、谷德昭、曾志偉、周星馳；
二O一幾年卡士有：
吳君如、王晶、呀叻、梁家輝、黃百鳴、谷德昭、曾志偉。
嘩，觀眾唔悶佢地都拍到悶啦吓嘛？咦，周星馳由諷刺中共到近年投共政協喇，大家上YouTube睇舊片喇，咪住！望吓2016，乜又係你呀周生？《家有囍事》 修復加長版竟然放上影院？將軍知黃百鳴擁有院線，但竟然慳皮、技窮到將23年前嘅戲重新剪過再掟出嚟？
係，係好好笑，好笑得過大家都打算買飛入場...　

王晶炒《賭神》冷飯，黃百鳴仲勁，加水放《家有囍事》入微波爐再叮過。

做創意的懶得創新，
不學無術的鬧人會考冇12條A，
大學校監叫商界唔好捐錢比大學，
審網絡條例的四方硬骨頭唔知咩係直播打機...
莫講敬業樂業，香港人開口埋口「專業」一去不復反，求求其其得過且過，不再講道理，不再講邏輯，不再講事實，齊齊食老本，贏嘅係我努力，輸嘅係後生搞亂檔，有話語權有決策權嘅「總之病」病發，只懂說：「總之我地嗰代好辛苦，你地後生仔識咩吖，總之我地話咩就咩，比咩你都要逆來順受啦」
佔據整個主流媒體、權貴、街頭巷尾，翻叮舊一代人嘅歡樂，下N代人硬食啦。

傲將軍面書：
https://goo.gl/gq9fPJ

（家有囍事截圖）