和理非必勝定勇武抗爭必勝？文場必勝定武場必勝？用左腦必勝定右腦必勝？

即係咁，如果有人同我講：「你一定要跟我咁做，你個做法一定唔得」，我一定係暗鬧：「x你喇，衰咗你賠得起呀？」（心情唔好明鬧）。正如好多人話：「我為你好，你一定要跟我咁做。」其實係想證明自己啱多過想做到件事，大家要記住今次關乎香港存亡，而唔係意氣之爭，我哋無一個賠得起，你敢唔敢講完全跟你嗰套就一定得？

今次佔領事件以至公民覺醒，並非單向線性發展，因為唔係睇緊cctvb劇，全個事件背後，係多年嚟有好多事同時發生之後，由雙學攻佔公民廣場開始引爆，當中有唔少人播過種，包括學校教師（例如通識）以至本土派等等，有邊個夠膽話跟晒佢嗰套可以做到呢一連串後果？今日公民醒覺雖然唔係大多數，不過係三十歲樓下年齡層係8成以上支持，對今後香港發展必然影響深遠。有人可以抹殺之前嘅人所做過嘅野嗎？

最近發生咗和理非與勇武支持者爭拗，爭拗情況我大至上可以總結為：

1. 武力抗爭一提出，和理非即割席或譴責，甚至鳩嗚都被認為一種暴力要叫停（不過都有人話鳩嗚係膠）。

2. 和理非做任何野同唔做野，都俾勇武派話膠同縮沙。

其實係咪想鬧到唔同意見嘅人要停，甚至跟足你嗰套連不同聲音都唔容許先得呢？

反觀以往好多成功抗爭國家，例如南非和印度等都係和平與武力多線發展，甚少見到一面倒嘅抗爭成功，而今次香港用咗和理非為主體嘅抗爭，亦見有很不足之處，就如匿名者之前所言，因為人數非壓倒性，要用和平方法進攻好困難，龍和道一役係一個明顯例子，幾十個警察已經能夠阻到幾百人，反觀防守亦然，當日旺角黑夜睇到黑社會攻擊學生，喺人數不足下都唔還手真係睇到我想喊。所以勇武力量係現階段係有直接需要。

至於堅持和理非可唔可以感動人，以至抗爭成功，我就唔敢講，正如當日我估唔到和理非可以感動到咁多人（比起原本佔中），他日話唔定可以再創奇跡，喺大家都係未知之數嗰陣，雞蛋都係放多喺幾個籃好啲，而且有樣野係好重要，就係留舊客嘅成本比起要大量宣傳去吸引新客嘅成本低好多，所以留舊客（參與者）係非常緊要，尤其係現階段新加入嘅人唔見得多，如果失埋舊參與者真係損失慘重，勇武派係咪咁肯定呢個時候，停咗和理非參與者就會投向勇武派（尤其係香港人被教育「和平」咁多年）？喺呢一刻嘅現實環境和理非繼續進行，起碼會保住一班參與者。

兩派既然現時未能成「同路人」，就倒不如先分道揚鑣，停止去阻止對方行動，各自探索去向，與其勞氣去鬧對方，不如先好好檢討自己先會有改進，講白啲如史兄講：「it's too easy to point the finger.」 （鬧／賴人就易），鬧人其實係無問題，如果對方真係唔啱鬧得言之有理其實係好事。

仲有係抗爭路線唔一定只有勇武開拖或者和理非，還可以係用腦或用情（依個我唔多識，應該有依啲高人）等等。

題外話：有樣野值得留意嘅係和理派嘅轉變，雙學甚至戴耀廷雖然割席，但已停止阻止武力，而雙學仲同泛民都割埋席（有人最後一刻先留守）。