離地確實會令人誤判。
我離地得過份，令我選前一直認為泛民會大敗，敗得一敗塗地史上最差要跳IFC嗰隻，結果出到嚟，當然仍然被建制㩒住打，但所謂支持民主陣營有所進帳，是始料不及。　　
我錯，錯得離譜。
但激進派輸得難看，太難看。不得不寫一篇。

先講自認進步但渣都冇的幾個組織，齋看議席數目：　
社民連，這幾年應該沒有人對其還有期望吧？兩屆白果好合理，村長之流簡直抵死。
人民力量，雖然政見相左（如果佢地有立場的說），但也估不到一席都冇（譚香文沒有用此牌頭）。
熱血公民，結果意料之中。泰博票數意外地低，這是必要深切反省：有學歷有型象都輸到咁，執行上缺失是甚麼要虛心認真檢討。　　　
其他建國／激進派，除咗羊羊做得好，其他的，要認真諗諗自己條路。而值得講嘅係支持者，唔該，拜託，唔好呻唔好怨唔好賴，仲以為自己好強大。落到街，每個人都好渺小，就算見啲人話本土覺醒，都唔代表佢地會比票的，明未？

當然，自認激進組織，就不應期望在失衡議會（還要是區議會）做到甚麼，應看重議會外抗爭，議席只是bonus，但得票絕對有參考價值：尤其是低得可憐的時候，就要謙虛、誠懇地檢討路線、手法、執行上有甚麼不足。
甚至乎要考慮組織再定位，轉型，或研究存在必要。
唔選，仲有好多野可以做，唔好浪費資源時間心力。

咁懶溫和的呢？
民主黨跌議席，大佬墮馬，但第二梯隊紮實，可見區議會仍重實務，且民主黨壽命還會很長，咁好大鑊。　
民協、公民黨、新同盟、街工、工黨成績都比想像中好。
青年新政／傘兵／素人表現喜出望外，在少資源下實在難能可貴。只希望當選的唔好變討厭政棍。

親共陣營雖然有面目可憎的人收皮，但整體穩陣，尤其中產區。
乞人憎的意外敗陣，主要兩個可能：1）失勢冇後台幫；2）共匪唔係萬能。
值得注意嘅係，幾年前喺維園練兵嘅建制黨青年軍漸漸成熟壯大，形象包裝、說話表現都比大部份反對派強，係超難纏對手；至於落選嘅土共大佬，唔係真廢就假學歷（或兩者皆是），中共放棄／懲罰佢地好合理。

種票、掌心雷固然可恨，但落敗的反政府團體不要賴，畢竟有不少區都撼贏到共匪。

雖然有好多不幸中之大幸的消息，但仍然沒有樂觀的理由。鉛水區選民大都揀了建制、投票率還不高、暴力事件（而冇咩人理）等...真係令人擔心公民質素進步得慢過赤化。

我預計得錯誤，是離地之過。
確實，蘇胳肋底講得好：「我只知道我一無所知。」
有錯就要認，認完要諗點解，仲要實際行動。
經過反醒後，再望埋呢個網友所言：『傲將軍平時寫開男女關係，今次（白水叫人含淚）都要出聲！』 ，相信：1）新讀者真係以為我寫開情愛而唔係政治，畢竟政治個個都討厭，而且冇睇過我文嘅人比睇過我寫政治嘅肯定多N倍；2）我轉型有小乘，應該真正 #岸郊野唔賞鯉 ，少理政治多寫情事，令人身心舒泰。
所以日後繼續少寫政事文，多努力寫愛情、職場等輕鬆文章好過。

至於新東補選、下屆立會大選，其實冇咩特別好講，赤化到都唔知仲有個議會有咩用，只係希望隻羊成功反轉香港。

最後想講：所有為拒共、建國出力的人都可敬，但要調整策略之餘，更重要更重要的是要令自己強大，生活上形象上表達上行動力上情緒上都要強大，才能走得更高更遠。