今晚在大廈大堂跟一位相熟嘅看更阿叔傾計。

阿叔問話：「余生今晚夜咗喎。」

我：「係呀，今晚走咗去金鐘睇下，了解下而家點情況，支持下啦。」

阿叔話：「余生乜你都係支持班學生㗎。我都係呀，今次班學生哥，年青人冇得輸架，最後一定贏到班當權老鬼。」

我問點解？

阿叔話：「五年十年後班當權老鬼，釘蓋嘅釘蓋，老人痴呆嘅老人痴呆，排隊瞓四塊半啦。」

「到時班學生年青人先步入壯年，鬥？鬥長命呀笨。」

我點點頭道：「你比我更加激情熱血喎。」

最後阿叔的一番肺腑之言：「中國佬唔會同你客氣架，當年香港幾個大工業，好似紡織、玩具、鐘錶、電子，有同你有商有量畀生存空間你？冇呀！我以前假假地都係玩具廠老闆嚟。而家唯獨金融佢搞唔到啫！」

「今日香港仲有乜野同佢鬥，咪就係民主、自由、法治、制度囉，我哋唔爭取，咪等死囉！我十年八年後都可能釘埋蓋，係唔係呀余生。 」

最後我點了口煙道：「多謝，估唔到今時今日有你咁樣嘅老香港支持民主公義。」

阿叔回：「唔好咁講，出心出心啫，不過唔好意思余生，大廈唔食得煙架。」

（本文原載於作者面書，蒙作者答允轉載。）