好多人都會話，其實……香港都幾好呀！

但係最近看到法庭去頒發禁制令，禁制示威者不得佔據街頭，律政司司長袁國強走出來同市民講，無論點都好，民主最主要一個基石，就係法治，然後就說示威人士正在犯法、破壞法治、罔顧法治，跟住就話俾大家聽，如果無咗法治，仲講咩民主呢！

其實任何法律的底裡，都有一個自然的公義，我哋遵守法律，係必須有一個前提，就係法律係保障社會、人人平等，法律係行使公義，但係法律係有可能行差踏錯，呢一個世界係有可能有惡法的出現，如果我哋唔理會法例是否保障公義，我哋唔理會法例是否保障人民，麻木地以法律的條文去約束整個社會同人民，咁呢一個就唔係法治，係法管，利用法治去管治人民，利用法例去做一些不公義的事情，現在香港慢慢已經不再是 rule of law，慢慢走向大陸的 rule by law 了。

什麼是公民抗命？就係當我哋發現我哋嘅法律同法規不存在公義的時候，又或者有人利用法律去對付一些公義的事情，我哋作為社會的一分子，就有權利和義務走出來公民抗命，有一些人，甚至不惜付上法律的責任都要去對抗不公義的事，現在有好多主流傳媒正在扭曲法律的含義，然後再同大家講，你哋示威人士嘅理想同理念幾崇高都好，法例寫咗係咁，你哋就要遵守。咁如果喺呢一個不公義的立法會，一個無民意授權的立法會，忽然之間有一日，佢制訂了一條法例出來，如果女生著短裙出街，佢俾人強姦就唔係犯法的事，當一條法例完全無道理可言，完全唔係保障人民，完全冇公義可言，難道我哋都要遵守法例？

點解我哋會有這些惡法的出現？就係因為香港政府呢個政權，並不是由民意所產生的，所以普選點解咁重要？示威人士不惜負上法律的責任，留守街頭，就係唔想他日香港好像大陸一樣。根據傳媒報道，警隊「一哥」曾偉雄批准兩個警察員工協會（警察員佐級協會及警務督察協會），為同袍進行內部募捐，早前捲入公民黨成員曾健超被打毆打案，正被停職的七名警員，料也可獲支援，咁咪好大鑊？原來警員可以通過一個這樣的制度，即係變相鼓勵或認同該七位同袍之暴力行為，這個是什麼世界？知法犯法還可以得到庇護？呢個香港社會已經變得好唔安全！

我哋點樣可以阻止這樣的事情繼續發生？我哋要有真普選去保障我哋，要有選票去制衡這一個政府，我哋要有應得的公民權利，改變社會制度，只有這樣，我們先可以拿回一個安全、宜居的香港。有人說，沒有旅行的生活，就只是生存，生存只是衣食住行，只要滿足最基本的要求便可，但我卻認為，我們要有基本人權，自由、平等、有尊嚴的生活，人生才有活著的意義。