1. 中央都唔會畀民主你架啦！
答：民主唔會係跪求得來，而係要爭取返來！

2. 即使你哋好有決心，但真係未必得架喎！
答：都未試過個心就不停憂慮「未必得」，咁點可能成功？

3. 點解唔見好就收？
答：一條毛都未爭取到，點樣見好就收？

4. 政府都已經釋出善意同學聯對話啦，你哋仲嘈咩啫！
答：大雄想拎返自己舊玩具，俾技安打鑊之後，技安好有禮貌咁話：我唔諗住俾返舊玩具你架喇！俾你係大雄，你係咪就唔攞返？

5. 投票決定啦！我哋而家喺度投票，就正正係體現緊民主！
答：喺一個無民主制度嘅社會試玩民主新體驗，對於爭取民主係毫無幫助，情況就等於你玩煮飯仔係唔會炒到碟餸出嚟！

6. 咁我哋體現民主有咩唔啱？
答：你要炒到碟餸出嚟食，做咩仲要玩煮飯仔？而家係應該要學吓點樣炒一碟餸。

7. 有大會先凝聚到力量！
答：事實上，群眾自發行動做到嘅野已經遠遠超越晒大會能夠做到嘅野，由928到而家嘅佔領係史無前例！

8. 你哋唔好內訌啦，敵人見到我哋咁樣就最開心！
答：如果俾啲內鬼起到個大會去叫人散水，咁敵人就真係最開心喇！有冇聽過咩叫先安內而後攘外呀？

9. 大會都有佢嘅用處嘅！
答：大會凝聚力量如果用嚟對抗係無問題，可惜國民教育同東北發展嘅事件話俾我哋知，大會最大嘅用處係凝聚力量，然後散水。

10. 無代表咁點同政府傾呀？
答：無公民提名同取消功能組別就唔會停止佔領，仲有咩需要傾？

11. 咁佔落去真係會影響民生架喎！
答：夠呢個政府嘅政策影響民生？未佔前都民不聊生啦，你唔知咩？

12. 咁佔落去係會破壞法治架喎！
答：警黑合作，濫用暴力，政治檢控，放犯……香港法治一早已經被港共政權破壞到蕩然無存。佔領者其實就係想重建喪失咗嘅法治。

13. 警察入面都有好人，唔好一竹篙打沉成船人！
答：監躉都有好人，係咪可以放晒出黎？

14. 警察唔係我哋嘅敵人，政府先係！
答：由警黑合作嘅一刻開始，香港警察已經自我毀滅！佢哋本身就係政府嘅一份子！

15. 佔馬路無意義，民意先係我哋既籌碼！
答：一個未有民主的地方，叫人只係用民意做籌碼爭取民主就等於喺石器時代叫人用支票咁荒謬！

16. 真普選爭唔爭取到唔係問題，全民覺醒先係我哋嘅目的！
答：今次真普選爭取唔到，連啱啱覺醒嘅人一定都會被秋後算帳！

17. 再佔落去都無意思，返屋企好好諗清楚下一步應該點做。
答：而家嘅情況已經去到「返咗去，下次已經無得出返嚟！」

18. 你哋除左瞓街金坐馬路，仲有咩下一步？
答：未經歷過928當日其實大家都唔知下一步係點，之後係點大家應該見機行事！

19. 你哋唔好衝擊啦，記住要和平理性非暴力呀！
答：當初無人衝出馬路，今日就無受國際關注嘅 Umbrella Revolution！

20. 運動無成功唔緊要，唔代表運動無成果！
答：種唔成棵蘋果樹唔緊要，唔代表我哋執唔到條蕉！