Formula E電動方程式賽車於中環海濱舉行，港府當正盛事去搞，筆者身為香港人，就算對賽車一無所知，都試下搵電視直播，觀摩一下有幾勁，就如從來都不明白搶包山賽制，每年太平清醮都要望一望直播先安樂。

賽事由香港電訊HKT贊助，直播理所當然於旗下平台ViuTV播放，加上now sports有豐富直播足球經驗，本來以為會無甚問題，豈料即日就有驚喜。

睇報紙，話ViuTV於星期六傍晚5點25分直播「電動房車挑戰賽」，賽事有5名藝人參戰，包括「狂野之城」郭富城、「律政強人」方中信、「大師兄」錢嘉樂、「岡本女王」莊思敏和「大文豪」周柏豪，睇頭十足，作為非車迷，確實是一個入門上佳之選。

一如所料，比賽的速度感與正賽有一定分別，但勝在娛樂性豐富，例牌「炒埋一疊」，主持人一句「周柏豪直插咗一野」，就更加引人入性。豈料賽事播到第8圈，就突然因為要播6點鐘新聞而要腰斬。

身為一個運動迷，體育賽事要遷就新聞報道，本來就不是新鮮事，但電視台有沒有做好相關準備？好明顯沒有，先看同系的收費台now sports頻道，眾多頻道當時正重播過期西甲、高爾夫、網球、壁球，卻沒有一個接力播賽車，最搞笑是看ViuTV的6點鐘新聞時，卻標誌著賽車片段由now sports提供。

至於ViuTV，新聞後到深夜，本來都沒有相關的重溫節目，深夜繼續重播飲食及旅遊節目，到晚上再轉台看一看，畫面顯示「由於賽事超時，今晚11時正將播放『2016電動房車挑戰賽』完整版」，算是補飛，但沒有為意的朋友，就會錯過了「周柏豪直插咗一野」。

被炮轟後才去補飛，你可以說ViuTV比TVB肯聽取民意，但難掩直播應變能力低的問題。事實上，只是ViuTV都是以重播為主，所以節目調動亦無包袱，讚唔落。



（ViuTV截圖）