由荃灣去深井上的士，的士伯伯和我之間的對話，真人真事，有點長：

伯︰有冇去佔領呀？

我︰冇呀。（我通常去金鐘、旺角行街而已）

伯︰頭先我車個警察呀，好鬼慘，返工成廿幾個鐘，冇得坐冇得瞓。

我︰係呀啲警察真係好慘，返工冇得瞓（返工有得瞓嘅介紹我去做）重有呀啲學生真係冇人性架個個帶住保鮮紙，又有遮，啲雨遮篤得死人架嘛！而家啲學生哥呀，好大隻架。人又多，想踩死啲警察咩！？

伯︰好彩警察有胡椒噴霧同催淚彈咋，如果唔係呀，就要出解放軍喇。

我︰出解放軍啦，六四時出打死啲學生，中國換到廿幾年繁榮，拿拿聲出解放軍，死一兩個學生，香港可以繁榮多幾十年就好啦。

伯（開始係倒後鏡望下我）︰如果出解放軍，就要係深圳操落嚟，到時死得人多。

我︰香港人咁唔識死，阿爺見我哋冇生意，就畀自由行我地，幫我哋買晒啲日用品；冇人生仔，就有雙非幫襯醫院；地鐵冇人搭，就有水貨客；股票地產就搵國內同胞托住。有咁多著數，而家重嘈嘈閉。

伯（轉話題）︰其實同共產黨要慢慢傾，夾硬嚟冇用架！

我︰司機大佬你講得真係啱呀，回歸得個十零年邊得嚟咁快有普選，雖然基本法寫明有，但都要體諒阿爺，我冇普選或者個仔有，我個仔冇或者個孫有，慢慢嚟呀嘛！

伯︰唉全中國都冇普選架啦，咪又係咁過，而家啲後生真係，受人指使，俾人利用。

我︰啱呀，喺中國都冇普選架啦，我哋點都衰唔過北韓啦，而家啲後生傻架，個班學生都唔知係唔係識法術，識催眠，唔知點解咁多人聽佢講，香港人傻架，個個聽佢哋講。

伯︰而家啲廢青，買唔到樓搵唔到錢咪容易俾人利用囉。

我︰係呀係呀，香港人買唔到香港樓即係自已冇用啦，重好意思四圍搞事。係呢，司機大佬你有冇仔女呀，買晒樓未呀？我睇你都係為興趣架啫，睇你都享緊兒孫福啦。真係羨慕你！香港而家好亂，有錢好移民啦。街口有落啦唔該。

伯︰……對唔住！

註1︰阿伯你冇對我唔住，你做咗幾廿年人，你對自已同啲兒孫唔住。
註2︰我係真心架！！

（本文原載於作者面書，蒙作者答允轉載。）