話說我啱啱落機，推住行李喺圓方等緊人接我時，先有一操普通話男子，過嚟問我聽唔聽得明佢講嘢，我話識，跟住佢就話過嚟香港出差，有嘢要我幫忙，我已經起戒心，跟住佢就問我攞錢，又話聽日會還番比我點點點，我都費事理佢，問佢你真係當香港人儍的嗎？之後我就行開，過對面餐廳門口，然後先醒起唔記得影相或出直播，失敗！

不過唔緊要，騙徒又點會得一個？我個 friend 又未到，等多5分鐘左右，另外又有兩個女人走埋嚟問我聽唔聽得明普通話。心諗，使唔使咁密呀，乜我個樣咁似羊牯咩？今次我醒水，開定電話影相功能再同佢講嘢，今次佢哋唔係出差，係旅行，開場白又係話有嘢想我幫手（我個樣咁似好鍾意幫人咩？），佢話過嚟旅行無晒錢，屋企人要聽日先匯到錢比佢，仲有另一個朋友喺嗰邊，已經餓到行唔到，想我比錢佢哋食飯，我望一望佢無出聲，見你兩個人，一個揸LV，一個揸Gucci，食飯都話無錢？

佢繼續講，你其實買嘢比我哋食都可以，心諗，你鹵味，當時我企喺 Robuchon 門口喎，無錢食飯都咁識食？喺呢個時候我就舉起電話影咗呢張相，佢兩個一見我影相就問我做乜影佢，我話你想騙錢所以才拍你，佢仲死撐話你以為我問你拿錢嗎？我只是想你買東西給我們吃，我那有騙你？然後就攞個電話出嚟影番我，跟住就走。

另一個醒呀，一見我影相即走，所以影唔到。睇番張相，頂呀，原來賊真係有樣睇。