對新升班既李斯特城，曼聯又輸三比五，雖則近來曼聯輸波已經唔係新鮮事，但仍替佢不值，畢竟今場敗仗的主因都係球証執法不公，儘管多年來一直受惠於此。

曼聯雄霸英超多年，國際球迷不斷增多，尤其亞洲，自費爵離任後，成績大不如前，iPhone出新版都追唔到現時聯賽排名，fans們都簡單地將責任歸咎於接任嘅莫耶斯無能，而家到雲高爾接任，名氣實力係國際肯定的，但賽績改善不大，球迷係時候諗吓，成績欠佳並非單純領隊能力問題。

喺英國，輸波好慣常聽到嘅名句就係“We are beaten by better players.”去到英格蘭國家隊一樣會咁講。喺國際球壇上始終要坦白，勝負仍然係取決於落場球員，如同爭取自身權益，代議事村長唔得掂，唔通你就坐以待斃做港豬？落場踢波起碼十一人對十一人，國際球証現時水準算係咁，十分公平，好過係香港做抗爭。

英格蘭人做主將嘅球隊喺英超攞冠軍，但係同樣嘅人代表國家，卻未能為國家隊爭取佳績，要解釋英格蘭不濟表現，應該話英超水準太低，定係佢哋命運原來都係同香港人一樣，被迫愛國而無心戀戰呢？睇返英超水準，車路士係最好例子，九十年代中期開始有多國國腳投效，球員技術水平不容置疑，喺歐洲球會戰場一樣踢出高水平，球員返到國家隊亦能保持表現。

就咁睇，英格蘭球員真係唔多愛國，只係better club players，但認真睇波嘅人就知唔係，無可否認，英格蘭球員技術水平真係未夠班，另外更加要承認係英超，某些人比其他人更平等。英超球証水準經常被質疑，其實依個講法幾和稀泥，有問題被質疑嗰啲一樣做國際球証，但國際賽又會稱職返咁有水準，所以事情邊有咁簡單。除咗經常話某隊特別易判十二碼之外，如果球齡耐嘅車迷，可能都仲記得史高斯點樣用手接咗對手開個波落地冇事繼續踢，仲有經常踢死腳冇罰等等，由歐洲到國際賽做慣手勢嘅，都一一受返應有懲罰，史高斯歐洲賽對辛尼特排球式撒波結果兩黃一紅出場，不過當代表國家時懲罰是整國國家承受返。

到費爵離任後，恍惚不只一切優惠被攞走，更加要還。今場李斯特城明顯兩次推人屬於犯規不被判罰，反而輕易碰撞就搏到十二碼，以前踢人冇罰，而家被踢冇罰，明眼人可見。喺英格蘭，球証經常佔過重地位，每每吹停就會教訓球員佢想點，球証變咗playmaker，喺其他地方比賽少見。英國波係一大娛樂事業，爵士離任，皇朝沒落，“What goes up must come down”，畢竟睇落係一個好故事，或者有意無意具影響力嘅第十二人成了美事，做曼聯球迷應該認命，你嘅光輝同失落都係成也球証，敗也球証。

英格蘭足球舉世注目，注目係佢嘅聯賽同盃賽，速度快身體對抗性高，尤如荷里活既動作片，有時標榜武士復仇，有時講逆地反擊，足總盃更稱為爆冷溫床，觀眾常期待睇giant-killing，好睇過戲。可惜去到國家隊賽事，各國都傾盡全力嘅比賽，英格蘭則變了同香港每年七一一樣，兩年一大賽，出一身汗對自己對傳媒交代了就完事，失敗嘅定位早定了。

一個健康發展嘅比賽，需要公平嘅環境，沒有優勝劣敗，製造出特殊階級，出外再上一層嘅比賽只出洋相。而對特殊階級嘅支持，這只是盲目，只是愚昧，說來喺香港常見。

（now.com截圖）