啱啱過去嘅九月三日，叮噹（多啦A夢）負九十七歲生日嘅早上，某個自稱「沉睡中獅子」嘅國家喺八九年用坦克碾軋學生嘅廣場上搞咗一次案件重組，相信大家還記憶猶新。而香港，都係「一男子」嘅決定之下，放咗一個「特別假期」，佢哋稱為「抗日戰爭勝利紀念日」。

但查閱歷史，原來呢個假期，喺一九九七及一九九八年曾經出現過，而再回到九七主權移交之前，原來呢個假期就叫做「重光紀念日」。

呢個用來紀念香港結束「日治時代」嘅紀念日假期，可以講係「自古以來」唯一一個，只係屬於「香港」嘅假期。所以，喺九七之前，臨時立法會就開會制定了《假日（1997年及1998年）條例》，將呢個假期改名為「抗日戰爭勝利紀念日」，好令香港人淡忘當年「香港保衛戰」嘅歷史，消滅「香港」自己嘅標記。

去到九八年，特衰政府又再提出《1998年假期（修訂）條例草案》，決定九九年後嘅公眾假期安排，呢次就連已經被改名嘅「重光紀念日」都被抹殺，取而代之係未經過公眾諮詢而設立嘅「佛誕」假日。而當時梁耀忠議員提出修正案要保留「抗日戰爭勝利紀念日」，都只係要求修訂該假日在二千年恢復，而不是九九年，給予多一年公眾做資訊，亦都給予印刷公司有時間調整日曆，來選擇到底取消邊一日假期來維持每年十七日公眾假期嘅原則，已經算係個非常溫和嘅建議了。

但係當時，特衰政府及建制派議員迴避選擇「佛誕日」冇諮詢過公眾嘅問題，只係不斷重申，紀念抗日勝利，可以繼續以其他形式紀念，冇必要放假，而增加假期，由於當時經濟不景會造成負擔。見到呢啲理由，根本就可以原封不動拿來駁斥今年九月三日嘅假期，唔通今年香港經濟情況非常好？話「佔中影響」嘅一般零售業老闆冇出來抗議放多一日假，影響佢哋經營成本？由得嗰邊自己放飛機，鍾意紀念嘅人自己去紀念咪得了，點解一定要放假？但你再有理有，總之佢要通過嘅，點都會通過。

好了，到咗投票一刻，先係梁耀忠嘅修正案「由於議題未獲得兩部分在席議員分別以過半數贊成，她於是宣布修正案被否決。」，分組點票再一次勝利。而去到草案表決，「全委會主席宣布有53人出席，36人贊成，1人反對，12人棄權。由於議題獲得在席議員以過半數贊成，她於是宣布議案獲得通過。」咩話，得一人反對？睇返記錄，係，得梁耀忠一人反對，前面強烈反對啲人去晒邊？咩話，何秀蘭，李卓人，吳靄儀，劉慧卿仲係投票贊成？

而我係最近先知道，吳靄儀係九八年曾經講過：「只有這一天（重光紀念日）是屬於香港本身歷史的」，但佢又投贊成票？媽啊，我好亂啊！所以我就寫咗呢篇好亂嘅文來表達我依家嘅心情。信息嘅時代，墳係用來挖嘅，屍係用來鞭嘅，但如果大家選擇遺忘，就唔好怪阿寶經常要出來講一句：「人類總要重複同樣的錯誤。」

立法會─1998年9月9日會議過程正式紀錄
http://www.legco.gov.hk/yr98-99/chinese/counmtg/hansard/980909fc.pdf