（第一回重溫：http://www.passiontimes.hk/article/07-30-2014/18136）

（第二回重溫：http://www.passiontimes.hk/article/07-31-2014/18151）

（第三回重溫：http://www.passiontimes.hk/article/07-31-2014/18304）

作為一個新入職嘅職員扮鵪鶉就一定架啦，但係我都過唔到三個月就完型畢露，明顯我就係世界仔啦。我係呢種教育界嘅古惑仔，就梗係不動聲色睇情況行事啦！喺我返工頭一段嘅日子，因為教員室有維修嘅關係，唔知不幸定幸運我要坐係校務處，唔坐唔知，原來校務處就係學校第一收風位。由此起，我就成為學校嘅收風放風中心。亦因為坐呢個位，令我和書記成為好友，亦令我係大量的校政風暴中屹立不倒。真係做到早收三日風，潛水好成功。

自己友嘅用途

喺學校嘅自己友同大班嘅自己友唔同，學校嘅自己友唔係要嚟科水嘅，而係幫助自己搜集情報，我嘅自己友就梗係大堆頭啦，只係英文科主任、訓導主任、體育科主任、升學組主任等都係我朋友。 點解會咁，因為新入職嘅人喺教員室冇位揀，人畀乜我坐乜，離開校務處後，就同七個 SGM（高級教師）坐埋一間房，八條友坐埋就梗係多料收，有風互放，有事齊散。當然，呢班同事係需要 friend 底嘅，因為同佢哋 friend 咗就好似買咗保險一樣，有起乜嘢事都有人撐。而且佢哋各負責一組，揀入佢哋嘅行政組別，唔使比人恰。當然佢哋呢啲主任同我 friend 底就梗係要收定啲靚對付學校裡面嘅一班二五仔，專搞事又鐘意篤人背脊，我好彩命硬大步檻過。

敵對派系

我係嗰種開口得罪人，又好似皇上咁話「做人最緊要正直」。 第一個成日想整走我嘅係一個教體育科嘅老鬼，而佢最強技能係有能力搞我搞到自己要提早退休，正「甜筒」。 而我最大嘅敵人係我同在通識科內嘅一條契弟，因為我同佢所偏愛嘅同學相熟，所以時常係我背後放冷箭，我稱佢為「安祿山」，第一佢有安祿山之爪，第二佢喺科內常搞分化，第三用佢用錢買朋友，呢啲喺教育界係最為人所不恥嘅。而第三個同我唔啱嘅人物係輔導組主任，呢條友投共已久，仲迫自已個仔返大陸讀大學（周圍同人講自己個仔港大收都唔讀，考得差就差啦，契弟），佢係一個自認不凡嘅偽君子，而我就稱佢為「岳不群」。第四個敵人係教數學嘅靚女一名，同佢一齊做嘢真係死得，做錯嘢都算啦，成日唔返工，會又開唔到，仲要一日到黑代佢課，識出糧又唔識返工，正一「楊貴妃」。

待續……

________________________________

海外學歷點樣搞？

香港有大量回流港人，而且佢哋大多都已完成大學學位。

如果想喺香港教書應該點做呢？首先，如果你喺外地讀中學再完成大學學位，可先向考評局申請資歷認證，就可以得到學歷認可。但是很多學校只想聘請本港就讀的教師（英文科除外），因教師可分享其考試經驗，令同學有更好的準備。