上星期梁文道一篇《蘋果日報》嘅專欄文章《全部問題都是同一個問題》，開名向才子陶傑挑機。隨後才子基於先天有喺《蘋果》五日「地盤」嘅優勢，以MMA式ground and pound嘅姿態，「狂質」以梁文道為首嘅左膠文化人。望穿秋水，梁文道今日又再負隅頑抗，如果你覺得呢場係筆戰。但睇深一層，呢個只係乞食般嘅孔乙己式撩筆戰。

好睇還好睇，但梁文道掀起嘅，根本只係淪落到孔乙己式嘅所謂「筆戰」，好可憐。呢鑊嘢，其實從來都唔係咩筆戰，梁文道老早就撩陳雲等佢口中嘅咩本土派勇武派本土右翼筆戰，咁唔係無人回應，只係網上文章佢又睇唔起人（老一輩有孔乙己思維嘅傳媒人係咁），如今開埋陶傑名，屈佢搞港獨，咁才子就以「不回應」作「回應」，寫篇文話係「回應」，其實係眼尾都唔「哨」你一眼，以門高狗大、睇你唔起嘅態度耍你走，好似達官貴人對住乞食要飯嘅人咁，求其掟低幾兩菜飯叫你躝，但你又好衰唔衰，以為可以添飯，想要多個杯麵，仲想要海鮮味，才子回頭之際，諗兩諗條氣唔順，一次過將餵狗嘅爛臭過期四十年肉類一次過餵你，等你「如獲至寶」。大佬呀，你都係堂堂知識文化人乙件，俾人咁羞辱你就該安靜的走開啦，仲苦苦跪乞又有乜謂呢？

但你唔又怪得才子㗎，梁文道你成個discuss.com式咁喺度苦纏，猶如喺樂壇討論區研究古巨基唱假音就等於音域唔闊一樣低智，人哋直頭係笑9你7，你仲要喺度死咬唔放，研究吓「明日黃花」如果喺後日係咪要改口做「昨日黃花」咁，（in陶傑tone）come one年輕人～唔好再做孔乙己，你話哂喺大陸紅到咁，唔覺意做咗孔慶東就無謂。

最可恨嘅係，你話人哋誅心論睇你返大陸搵錢，我覺得梁文道係有道理嘅，但前提係，你梁文道又曾喺蘋果日報一連四篇文章，以誅心論嘅行文，喺無証無據無單據嘅情況下，暗示本土派收中共錢去分裂泛民，咁你又點怪得人哋又話你同是收中共傳媒嘅錢，仲要有糧單，去對香港說三道四呢？