地下鐵碰著她　好比心中愛神進入夢
地下鐵再遇她　沉默對望車箱中
地下鐵邂逅她　車箱中的暢談最受用
地下鐵裡面每日相見　愉快心裡送

睇完今期神獸漫話，我又想跟風講下地鐵。幾分鐘的約會，曾經是我的豆芽夢。

初中的時候，暗戀一位好受歡迎的男同學，於是天天早上返學都會守在他上車的地鐡站「撞」佢。

本來由屯門的家，返到葵盛圍的學校，我根本唔需要搭地鐵（sorry，我還是不習慣改口講成港鐵），但為了能夠成功在荔景站撞倒男神，和他一起搭地鐵到葵芳，經歷一場幾分鐘的約會。我首先要早半小時起床，再搭巴士到美孚，搭一個站到茘景，然後躲在角落，一見到男神便懶優雅、施施然地行出來，扮偶遇。

但即使比我撞到，也不代表就可以獨佔他，因為和我有相同想法的女仔起碼有三個，要享受一對一的地鐵之旅，只有靠運。

有時搶唔到做第一個「撞到」的人，唯有挨喺離佢幾個身位的玻璃，「沉默對望車廂中」，這樣瘋狂的追星行為，我堅持了三個月，之後我做咗佢女朋友，變成佢接我返學，但呢一段地鐵含春初戀劇目，永遠都會記在我的腦海𥚃，柒，但又幾青春。

然後鏡頭一轉，我哋嚟到2014年的港鐡。

只不過短短十年，地鐵已經唔再浪漫，當年埋伏男神的角落，已經比一舊又一舊的小孩糞便沾污咗...想企響月台上等男神出現再撲上去？sorry，你要首先戰勝拖篋大軍，殺出重圍之後，人哋晨早走咗。即使比你上倒同一班列車，但我哋已經無辦法再做倒偷望男神的戲碼了。無論身處邊一個站，車廂都塞滿大陸人，相距幾個身位，唔好話望，根本連呼吸都有困難。

每天幾分鐘　共你相識已互通
旅程何美麗　如在愛情小說中

今時今日，再聽返呢首歌，歌詞中的意境仍然很美麗。只是，它已經由一個夢想，變成了一個傳說。入到地鐵，碰著他的時候，我們已經不會含羞地撥一撥頭髮，講聲「唔緊要」，而係好似患上妄想症一樣，懷疑身邊所有人都是大陸人，媽叉咗佢先算。

愛神已經唔會再進入地鐵，保佑懷春少女，愛神一早已經畀自由行啲篋輾爆咗。

一個咁冇夢想，咁唔浪漫的地下鐵路，難怪列車頻頻出事，以示傷痛。

The Pure love is dying, you know?