熱血NFT，六百件全部售出，提前達標！

本來的計劃，是一星期賣出1000件，就馬上開劇集台，即時開拍熱血劇集。但是後來因為NFT的價格一直上升，所以就調整了銷售目標，要是2/5前賣出600件，也會馬上開拍劇集（但當然拍攝的預算也會下調一點啦）。

其實，我沒想過會達標的，更沒想到居然會提前達標（本來明天還會再升值的，會升到二千元）。

一直覺得未必會達標，是因為感覺到熱血觀眾對於拍攝熱血劇集，反應不算太興奮，畢竟他們主要其實是想開個網台聽下我鬧人，我地拍劇佢地都未必睇，等於訂閱了PassionPrime的聽眾，其實主要係聽我星期二晚講是非，小說漫畫都冇乜點睇。所以整多條劇集頻道，佢地未必好大興趣。

咁既然觀眾未必好大興趣，點解我想搞？
第一，主要係我想拍，我本來就是拍劇的，今日自己有個台，當然想喺自己個台拍劇。
第二，我想讓我的主持演員，有劇集可演。娛樂巿場重新興旺起來了嗎？經過剛剛那次新主持招募，我強烈地感到，演出機會何其少啊。所以，如果我地能夠做得到，我希望提供更多機會，讓大家可以演，而且我對自己的劇本有信心，畀心機去演，係會演到一啲成績出嚟。
第三，熱狗，就是不停前進的一個族群，過去十年，我們從未停止過拓展新業務，今年係熱血十周年，當然要搞新嘢！

但唔係話想搞就搞到，雖然之前試過幾次，籌唔夠數都照樣上馬新計劃，頂硬上，熱狗仔隊係咁，收費台係咁，熱血漫畫又係咁，因為熱血嘛！但係熱血左咁多次，個人頂得住，條數頂唔住啊。所以秀慧同Jessy反覆警告我，唔夠數一定唔可以開拍！

去到上星期五，都只係賣出4百件左右，我本來以為已經無法達標的了。
但最後幾日，大家展現凌厲後勁！主持們落力推銷，連熱血漫畫家都不停出圖，就連觀眾們都落水推廣，各出奇謀，務求賣多一件得一件。佢地度左好多橋，有特備節目推廣，又有觀眾設計賣T小遊戲，兩日間奇招盡出。

本來，2/5（星期一）截止日，我還在思考最後一天有什麼促銷活動可以做，結果早了一天，在1/5（星期日），已經提前達標！
感謝大家，各位的熱情，又再一次讓我感動！
所以，熱血劇集，馬上開拍！
因為我下調左個銷售目標，咁籌到嘅錢當然少左啲啦，所以經費都會減返啲，本來諗住每星期一集，每集二十分鐘嘅，而家調整一下，每集十二至十五分鐘吧，開播後仍然會是一星期一集。
本來已經寫好了一個劇本，是一個長篇的Sit Com，但開劇第一炮，先拍左武打片先。
先會拍一個九集的武打短劇，將熱血廣告公司的《JimGymDream跆拳道》（預告片：https://www.youtube.com/watch?v=czDX5JKvXIY），變成長片。所以會拍九集，每集十多分鐘，九集串起來，就會成為一套九十至一百分鐘的武打電影長片。
這套打頭炮的武打劇，是向張徹致敬作品，劇名叫：《獨腳刀》。

現在馬上開始籌備，即刻趕拍，熱血武打劇《獨腳刀》，預計六月中播出！（最遲六月尾啦）
播放形式及其他詳情，往後再公告。
再一次感謝大家支持！
但係往後都要大家繼續支持，所以記得要訂購 #PassionPrime ： https://www.passiontimes.hk/prime/
（牛妹都有訂）
暫時一星期一集，資源充足的話，就同一時間拍兩劇，每星期多劇播出，或者每星期多集播出，是我們希望做到的目標！
我們會繼續努力！