第十位：

年頭Hea到年尾

年頭Hea舞獅，年尾夜繽紛

香港經濟陷入衰退，到底原因何在？眾說紛云，有政治理由，有移民潮影響，也有瘟疫後遺症，但要說一個肯定的原因，就係：Hea！

由頭開始睇香港舞獅，見隻舞獅連跳都跳唔起，你就知今年實係無運行。開關之後，香港夜巿死寂，政府開始要搞「夜繽紛」，居然係搞啲街店檔出嚟，搶走舖頭生意，於是舖頭愈來愈差，搞到巿民寧願夜晚返深圳食飯，最後搞旺了深圳夜巿！

 

第九位：

今時今日閪面嘅服務態度唔夠㗎！

做餐廳至少要報警，再唔係就叉頸！

香港經濟寒冬，飲食業更是步入冰河期！

香港消費者對餐飲服務的厭惡程度創新高，今年投訴也特別多，香港餐廳騎呢怪事，可謂一浪接一浪！

黃店飲品有曱甴，應對方法居然是跑出來打客人！冰室上錯菜，客人想換過碟雞翼，經理馬上報警！客人帶了九個cup cake去慶生，餐廳居然收佢九個Cake的切餅費共九百蚊！食到條魚有蟲，餐廳居然話係來貨問題，唔關餐廳事。

今時今日，去餐廳食飯，唔係畀人打，就係畀人拉，唔係食曱甴就係食蟲，大冒險一樣！

 

第八位：

姜濤鬧完網民，再拍MV串粉絲

2023年大概是鏡仔的運滯年，自上年演唱會冧MON事件後，鏡仔一直諸事不順。

最不順心的要數頂流姜濤，年頭在叱咤鳩叫「掃掃掃」，在抖音被大陸網民大肆討論貶損。後來又不堪壓力，在IG開名鬧爆網民！最近出新歌，MV內容居然是串自己粉絲阻擾自己的平凡生活，惹起一浪脫粉潮。可謂鏡年不利。

 

第七位：

《給十九歲的我》奪最佳電影！

「拍咗先算上咗先算」

張婉婷的紀錄片《給十九歲的我》，花十年拍攝，上映優先場大獲好評，又出國參展又盛，但原來被拍攝的學生，根本不同意公映，千字文討伐影片，結果影片在爭議聲中取消公映。

沒想到，這部備受爭議的電影，居然獲得金像奬「最佳電影」，另一聯合導演郭偉倫上台領奬時，發表驚世感言，指出拍電影就係要「拍咗先算上咗先算」！一句說話，盡顯香港電影霸道精神！

 

第六位：

蠢西經濟大觀園：

阿儀、馬車、龍心，群傻亂舞

今年的網紅界娛樂界，可說是蠢西當道的一年，亞視力捧阿儀，居然突圍而出。鍾培生搞拳賽，龍心、劉馬車、周永恒一眾騎呢怪大集結，備受注目。

網絡時代，大家最愛看的都是傻人蠢西。

可惜，蠢西傻人都是不受控制的，亞視居然連一個阿儀都控制唔到，被黃蓉挾走！劉馬車涉嫌非禮未成年少女，賽前被捕，結果世紀拳賽變流局。

 

第五位：

大劉記者會Talk Three Talk Four

大劉今年連開兩場記者，話就話係澄清流言蜚語，但其實更似在開Talk Show，天南地北Talk Three Talk Four，除了澄清自己沒有和呂小姐復合之外，又鬧吓老蕭，又鬧傳媒，又係咁問記者有冇睇《愛回家》，定期為鬱悶的世界送上歡樂，功德無量。

 

第四位：

虛構「A小妹妹」呃捐款，黃絲繼續當Tommy係英雄！

Tommy為了呃捐款，虛構一個不存在的「A小妹妹」，騙取上百萬捐款，存入馬會戶口要來賭馬！

事件被揭發後，黃絲不單沒有批判Tommy，反而表示明白Tommy為掩藏手足身份，才食死貓，於是繼續捐款，支持Tommy幫助其他「虛擬手足」。

所以香港點解搞唔起元宇宙？因為黃絲根本唔需要，佢哋要自欺欺人，根本唔駛靠科技的。

 

第三位：

陳怡鬧苦主！

出金嘅都係貪得無厭，通通係食氣流嘅躝癱！

JPEX虛幣詐騙事件之中，眾多被補者當中，陳怡肯是VIP！

重點是她毫不反省，聲稱自己與JPEX是被迫害的，而且報警的苦主都是契弟，「想出金」的人都是「貪得無厭」，全部都係「食我氣流嘅躝癱」，又話JPEX之所以爆煲，係因為「九運加速」，用爆煲去收拾那些食佢氣流的「躝癱」！

 

第二位：

王進洋做臥底！

射水趕阿伯，電話呃阿婆！

黃絲前區議員，專蝦老人家，做區議員時，已經揚言喺公園用水炮射阿伯，話係為咗防疫，驅趕玩啤牌的公公伯伯，辭咗職之後，繼續對付老人，加入電話詐騙，負責上門向阿婆收騙款！

事發被捕後，居然自稱是做臥底，加入詐騙係為咗找出集團幕後黑手⋯⋯

如果他說謊的話，當然搞笑，如果他說的是真話，就更加搞笑！

 

第一位：

林作炒幣搞到好弊！

抽死人水搞到被炒，教人炒幣畀人拉埋！

靠抽水維生的林作，在這個炎上時代本來順風順水，但踏入23年卻抽著火水，先是拿鑽石山斬人慘劇來開玩笑，搞到丟失高薪保險厚職。轉行做炒幣，卻成了JPEX事件的串謀行騙嫌兇，搞到被拉人封艇，一舖清袋！

林作炒幣，變成林作自斃！

相關節目：
笑死朕第676集
2023十大笑死朕事件
https://www.passiontimes.hk/prog/5/676