最近TBB終於留得住我，已經好耐未試過睇晒三線劇集。放左工，做完《愛‧回家》，睇個《愛我請留言》，接個《M Club》，仲留得住我，睇完是是旦旦新聞，再睇埋個《烈火雄心》。男人sss會問套套如有類同的膠劇，有咩好睇？有咩爽得過一個晚上，完全唔洗用腦，「一齊分享睇電視嘅樂趣」。其實女人一生，只為尋覓一個肯「陪」自己睇晒三線劇集的男人。

女人話要高富帥，要有車有私樓有學歷有野心，講下架渣。根本女人就係靈長類動物當中最易受騙的，女人第一條原則就係「冇原則」，講過當然係唔算數啦，只要「浪漫熱吻」下，女人就已經「落搭」。而又有咩浪漫得過，明知男人sss冇興趣，靈魂出竅，唔想睇「都陪住」呀。

老老實實…
-->返唔返工都唔想用腦，返完工嚟講，井字過三關我都覺得難，陪我睇三線劇真係啱晒。

-->我係想TBB舉辦「答啱TBBFUN問題換取SAM哥一隻」遊戲，換隻SAM哥返來，都係講下架渣，我唔係想要隻SAM哥，我係想有人陪我睇SAM哥。

-->睇睇下三線劇，係想提出「男主角係靚仔的」呢條辯論題目，但其實我冇心討論，純粹等緊你嗰句「I agree with you」。

-->我係想個男人個智商偏高，但又唔洗識得解釋量子力學同黑洞源頭我知，夠醒去暗啞底睇咗預告，扮晒唔覺意估到劇情，我已經會同你講「你好叻呀」。

-->我想「一齊分享睇電視嘅樂趣」，好似KERORO同TAMAMA咁，TOGETHER「共鳴」。

All of the above都係「陪住」就得架啦。就算日日入動感影院睇「最新上映」，都比不上日日「陪住」睇三線劇。其實女人真係簡單到不行，從不高深，只係想睇下男人sss有冇心「陪住」。

最近套《愛我請留言》終於播完，D女人sss又好鍾意睇，因為套劇就好似女人sss細個嗰時睇D童話故事咁，個個角色都安排好一個著落，好似諸神歸位咁。翠如BB「掂到」黃浩然，梁嘉琪有個「誓死都一齊」，美妮有個「少年馬國明」，甚至周聰都勝在有羅蘭，又係嗰樣野，想男人sss「陪住」。而最重要係，女人其實就係想個人生好似TBB膠劇咁簡單，個主角想完成嘅嘢，想解決的問題，一定會趕得切喺第20集大結局嗰時做得晒，搞得掂，你話幾好呢。

PS.至於星期一套《西遊記》，um...又真係「陪住」都提不起勁來睇，不如「陪住」《愛我請留言》多次呀？

（《愛我請留言》截圖）

（本文原載於作者面書專頁）