是咁的，我覺得有必要回應一下陳偉業議員星期四在港台節目《自由風自由Phone》的言論。

陳議員响節目中指控黃洋達支持暴力，响節目中教打交。首先，我先介紹一吓陳議員口中講嗰個網台節目，個節目叫《實戰攻擋》，主持係小弟，Andy師傅同Joe Cheung，黃洋達亦間中係主持。

由熱血時報開台不久至今已，節目經過了兩個年頭，以堅抽打俾你睇作號召，介紹不同格鬥武術同武術界動向，我哋會定期請嚟香港或外地嘅武術家，分享唔同武術嘅特點，亦有教學嘅環節，例如有巴西柔術，以色列自衞術Krav Maga、Kali's 菲律賓魔杖、拳擊、柔道、空手道、詠春等等，如果咁簡單將武術同暴力劃上等號嘅話，係對所有武術界朋友嘅一種侮辱。

止戈為武，武術就係遏止暴力嘅最後手段，小弟鼓勵香港人習武，擁有武力而唔用，但面對暴力時無能力反抗自保，眼見親友同伴受害而無力救助，口講讉責其實是示弱，以弱者身份乞討憐憫。

武者習武，可以有一百萬個理由，每個練武之人背後都有一個故事，並非每個武者都渴求暴力宣洩，事實正好相反，我所接觸過的武者之中，大都對暴力嚏之以鼻。其實學武，不僅要學習如何鍛煉身體成為武器，更重要的，是要學習如何遏止原始野性的衝動，做到收放自如，進退有據，此乃武術所謂之法度。

對於何謂暴力，可能又是一個冗長的辯論，立場不同，背景不同，可能有大相徑庭的理解。我以為經過雨傘革命一役，大家眼見我們以往信賴嘅香港警察如何濫用暴力，我們對暴力嘅理解會有所領悟，但原來於某些尊貴嘅議員眼中，對暴力的定義仍是如此膚淺。

我不認為面對走私犯對民生帶來的巨大影響，每個人都必須以激烈行動去表達，但當前線行動者以他們選擇的方法去抗爭，冒著被無理檢控，被反對勢力恐嚇甚至暴力威脅，仍然選擇走出來抗爭的時候，可否不要光速割蓆並响背後放冷槍？

我並不要求陳議員向武術家道歉，反正我不能代表所有武術家發聲，但我作為一個武者、一個抗爭者，懇請所有已經喪失抗爭意志的議員，你哋都係退落嚟啦，讓有志的青年人頂上吧。

（港台youtube截圖）