同「姐死姐還在」阿奴隸獸傾開，真係好多人講咗好耐話辭職，但一直都冇行動。還記得四五年前，有個當時做咗五年嘅老闆話由一開始都嗌唔撈，日又呻，夜又呻，結果我呢家仲聽 聞佢喺度磨，繼續呻，真正三年又三年，三年又三年，真係十年都嚟緊頭，活著受罪但是又離不開咁款。而呢啲人原來間間公司都有。

佢哋當然藉口多多，其中一個就係工時長，莫講冇時間見工，連上 JxbsDB 睇吓有咩工都冇時間，喎。時間就像乳溝，唧一唧總會有。搭車望一望、上少啲高登 BabyKingdom 淘寶 ThisAV 個時間喺返度，佢哋唔知自己想去咩公司，唔知想轉咩工種，甚至唔知自己要咩生活。結果就咩一動不如一靜，就講極都唔去搵，叫佢哋裸辭，就好似叫佢哋用尼龍繩玩笨豬跳咁。（利申，做過一份工日日朝九晚零晨／清晨，試過連續兩個幾月日日返工冇放假。做咗一年覺得唔值就裸辭，行都轉埋。）根本就唔係時間問題，係佢哋唔係堅想走。學林輝話齋，「It's all about determination！」

有個講法仲得意，話見工好煩，怕面試。好似毒撚想拍拖，但又怕去識女仔。大佬呀，見吓姐，傾得有 Feel 咪一齊，冇火花咪 Byebye 你條尾，驚咩啫？

再叻豬啲會話，唉，啲野交唔低呀。嘩，使唔使呀，呢個世界冇話冇咗邊個唔得。太陽照常升起，地球仍然識轉，打工咋，做人世咩？

較合理講法係人到中壯年，上有高堂，下又仔細老婆嫩。呢班人除咗衰冇信心，更可能真係客觀條件難以轉身。Skillsets 有限，語文能力又可能唔叻，新科技又唔夠後生強，又冇鄰近國家人脈，一個唔覺意行業式微，性格又適應唔到出面新環境新規則新人事。唔好意思，難聽啲講呢啲人冇能力冇信心走出 Comfort Zone，係多年不長進結果。君不見王維基由電訊轉去電視，係由零開始，你估真係改一個字咁簡單？成個行業由頭學過。

中壯年因能力坐困愁城，係自己多年不思進取，自找的，條路自己揀，仆街唔好喊。唔好呻唔好怨，學劉江華咁收聲。否則會負能量影響同事，做細嘅睇你唔起，同級嘅唔畀面你，高級嘅又唔信你，只會一惡性循環越做越辛苦。

「得業大軍」系列

公司文化：http://www.passiontimes.hk/article/01-28-2015/20839

招聘廣告（上）：http://www.passiontimes.hk/article/02-04-2015/20986

招聘廣告（中）：http://www.passiontimes.hk/article/02-05-2015/21045

招聘廣告（下）：http://www.passiontimes.hk/article/02-05-2015/21074