今日（11月5日）傍晚，有網民上載圖片到「香港突發事故報料區」，指大窩口大廈街體育館外有貓跌落坑渠，消防員要封路拯救，不過就未有提到下文。據《東網》報道，消防員最終成功救貓。

其實早在上午11時，已經有市民在大窩口體育館聽到貓叫聲，懷疑有貓在坑渠內，而愛護動物協會派員到場後，亦只是聽到貓聲，故先放下籠捉貓。到下午5時，再有人於同一地點聽到貓叫聲，於是報警，及後消防員及愛協人士到場，撬開渠蓋合力救貓。

當發現小貓被困渠道之後，消防員先落沙井開喉，將貓沖到路旁的沙井位，之後再由愛協人員將牠捉住。愛協稱獲救小貓屬雄性，約3個月大，未有受傷。

不過就有愛貓之人表示，小貓落在愛協手上之後，如果無主人認頭的話，到最後亦有可能是死路一條，故期望有人將牠接走。

（香港突發事故報料區截圖）