每個男仔都有幼想過自己係超人：飛得、打得、睇得。超人十項全能，自保冇問題，保護女朋友易過借火，唔覺意仲可以救埋全世界。但俗語都話做人千祈唔好睇小自己，當你生於香港又可以長大成人，去到而家十幾廿歲都仲行得走得的話，其實你都已經算係一個超人。點解咁講？好簡單：一個正常人係香港生活會癲架。
有人話香港後生唔挨得熱，夏天嗰三十幾度就個個手持一把芭蕉扇。唔知點解怕熱會變咗無能嘅一種代表，只要你一話「好熱」就自然話有人你唔挨得苦。就算四十度都好啦，老人家都會同你講「心靜自然涼」，你覺熱只因為你有雜念。你話出到街個個都出晒汗唔係得你一個熱，佢哋又會話「大人返工點同呢？」人哋做野好辛苦芸芸，但明明香港辦公室都係有冷氣，照道理你返工幾多嘢做都好同熱唔熱係冇關係。不過就算有依個疑問你都唔會問出口，因為你知道只會得出「駁嘴！」依個答案。
其實喺香港做個「有用嘅後生仔」何止要唔怕熱，首先由小學仲係細路仔嗰陣，你就要學七種樂器七國語言七種興趣去多元發展，為日後做好準備，雖然明明你冇諗過做音樂家翻譯員。但係學咁多嘢嘅同時又要讀好書，最好科科九十分以上，就算一日廿四小時唔瞓都好，我都唔知點樣先可以樣樣完美 handle。六年小學生涯好辛苦咩？唔緊要，上到中學你嘅興趣班會大大減少，轉移去一大堆雞精補習班。中英數科學生物物理通識乜都補一餐，補完返屋企又要鎖埋自己做功課溫書，特別係中五六果兩年你有可能覺得自己同個隱青差唔多。你睇電視咩？你老母實問你溫晒書未。你答未溫晒佢會話你，你話溫晒佢都會話你：咁點解唔溫下一科／課／年嘅野？你想同佢講你睇新聞就係想增進下通識，了解下時事，但佢覺得你一開電視就一定係睇 Running Man 之類「冇營養」嘅節目。你知你點講都冇用，所以你又死死氣咁返埋房。到最後你通識唔及格又問你「點解會咁嘅？」，你又唔好意思同佢講而家連新嘅警務署長係乜水都唔知，又點可能及格。
好啦，我哋唔講學業依個咁令人煩惱嘅問題，如果你咁好彩搵到個男女朋友的話，你又要面對多一件事：小學嗰陣都已經唔夠用嘅時間而家變得更加唔夠。溫書嗰陣比男女朋友怪你唔抽時間陪佢，拍拖嗰陣比屋企親戚怪你掛住去玩無心向學。唔好問我點解佢哋永遠都淨係睇到差嗰一邊，依一點睇怕係人類嘅天性。你抽時間拍拖，對方又想同你升同一間大學要你努力啲溫書，到你溫書嗰陣，佢又話佢好悶不如今晚出嚟睇戲。好混亂？唔知佢想點？其實佢嘅要求好簡單，就係要你係一個超人，拍拖之餘又溫到書，溫書之餘又可以成日出去玩。唔好以為依個現像去到讀完書做嘢就會解決，到時就係會變成又要你儲錢計畫未來，但又三五不時要你去迪士尼荔園食自肋餐買禮物去日本韓國歐洲，但明明你人工得嗰一萬蚊。
以上嘅生活基本唔係一個人可以做得到，單單係點樣「拍拖同時溫書，溫書同時拍拖」同「洗錢之餘儲到錢，儲錢之餘洗到錢」已經係千古難題。你嘅父母、親戚、男女朋友對你都有住好高嘅要求，情況就好似全世界人類企喺原地等你抬起架三萬尺跌緊落黎嘅飛機，然後打敗一堆軍方冇行動而又入侵緊地球嘅外星人，同時你又要同女朋友結婚生仔，再打擊埋所有惡勢力，但只係得三個鐘時間比你咁樣。
我淨係坐係度諗下都已經流晒大汗，然後我又好似隱約聽到有人話而家啲後生真係冇用咁樣。係香港想做個後生，唔係咁易架。
作者面書專頁：
https://www.facebook.com/