每年到咗畢業生準備搵工之際，就總會有報道話九十後有幾唔捱得，又要高人工又唔肯 OT。對老闆嚟講有個人工有咁低得咁低工，時有咁長得咁長嘅員工先係最好，但一個做嘢做到呆晒嘅人工作效率又有幾高？員工雖然係收糧幫老闆做嘢，但員工都係一個人，都有佢自己嘅生活，員工嘅一生唔應該只係做嘢。我唔否認九十後好多人唔識禮貌做嘢又差，但咁都唔應該將所有九十後認定為任性嘅一群。唔做奴隸就要比人話，公平咩？

香港消費高，為咗養活自己同屋企人，好多人都會好著緊自己份工。就算個老闆成日臨收工先畀幾份嘢你話急用幫佢做埋先、就算返到屋企都仲要 keep 住 check e-mail、就算有幾多唔合理嘅要求都好，香港人都可以毫無怨言咁做落去。社會鍾意讚依班人肯捱唔怕蝕底，有獅子山精神，其實只係一班商人暗笑緊有一大班廉價勞工可以用。一班上咗年紀嘅五六七十後不論係打工定係老闆，都覺得做到隻狗咁係冇問題，因為佢哋以前嘅社會係多勞多得。就算到咗而家個社會已經變晒都好，佢地都拎住舊嗰套嚟辦事同埋作為批評「而家啲後生」嘅準則。其實而家九十後只係要求 work life balance，工作同時不忙要有自己個人嘅生活，依點本應係正常不過，畢竟返工唔係真係賣命，點解打工嘅要同你將生命都燃燒晒喺份工身上？

返公時間其實定咗係咁多就咁多，真係有急事耐唔耐幫老闆 OT 一陣其實唔係大問題，但而家班 HR 同老闆就當咗肯 OT 係基本嘢。但我相信喺老闆唔係畀唔成正比嘅工作量嘅情況之下，OT 只係一件無謂嘅事。一個正常能力嘅人理應可以喺工作時間內搞掂晒啲工作，如果佢日日都要 OT，我相信佢嘅工作能力係有問題。如果打工仔要 OT 係因為工作需要，例如個客係外國人經常係五六點先會覆你趕住要嘅嘢，或者日日都要對住大量嘅文件根本冇可能準時走，咁好明顯就係老闆嘅問題。一係你就直接喺合約寫明工作需要係放六七點，唔好簽完約先話其實 OT 係一件好正常嘅事，再唔係你就加高個人工。就算你出去食個公仔麵想要加料都要畀錢啦係咪？

喺香港無能嘅九十後一定有，但我覺得過份嘅老嘢更多。你嗰套而前嘅年代可以唔代表而家仲得，後生唔跟你嗰套做法唔一定係反叛，只係唔同年代嘅人思考上會有分別。喺話九十後出嚟做嘢唔識人情世故之前，班老闆又會唔會意識到時代已經唔同咗？點解人地 google 個工作環境咁多休閒設施去畀員工偷懶都好佢哋都可以有咁高嘅工作效率？對於班仲係以為死做爛做就係好嘅五六七十後嚟講，佢哋永遠都唔會明白。

作者面書專頁：
https://www.facebook.com/MaoYanDe