身為一個打工仔，星期一至五梗係一起身就趕到仆街。喺難得嘅星期日，梗係要去食返個好嘅早餐啦。所以朝早醒咗我就即刻衝落樓下間茶餐廳。

我：「唔該一個早餐A呀。」
侍應：「無早餐A。」
我：「咁早餐D啦。」
侍應：「都無。」
我：「A餐又無，D餐又無。咁你哋仲有啲咩?」
侍應：「你可以試吓我哋嘅早餐。」

我有一瞬間真係以為自己係睇緊麥兜，叫咩無咩。見到想食嘅嘢都無哂，我唯有走啦。臨走嗰陣有另一個侍應走埋來問我做咩唔食就走，我就大大聲咁講 :「我落嚟係想食早餐A啫，無我咪走囉。」

食唔到早餐A，我唯有去麵包店買個腸仔包做早餐啦。喺難得嘅星期日都要食包做早餐，我嗰刻嘅心情應該只有「打波先嚟落雨」嘅肥仔能夠體會到。

去到午飯時間，我又落返去嗰間茶餐廳啦。今次我坐低咗無耐，個侍應竟然自動上菜畀我。

侍應：「嗱，早餐A呀。」
我：「但我而家唔想食早餐A。」
侍應：「你今朝明明話想食早餐A。」
我：「咁呢家都晏晝啦，你畀個早餐我做乜撚先。一個早餐我點夠飽，我而家想食午餐呀。」
侍應：「屌，煮俾你又鬧，唔煮俾你又鬧。玩哂啦。」
我：「咁而家時間都唔同咗啦，唔係煮咗就叫找咗數架。根本你呢家咁做就係一種晦氣嘅做法。」
侍應：「咀刁到咁，同你呢種酸民講都哂鳩氣。」

跟住我都費事再嘈，因為「煮又鬧唔煮又鬧」根本就係一種詭辯。大家試諗吓，嗰間平時唔煮嘢一煮就煮毒藥嘅建聯餐廳，其實都可以用同樣嘅理由反駁大家嘅指責。佢都可以話我煮毒藥你又鬧，唔煮你又鬧，你哋玩哂啦。老闆要你交份報告，你就交咗份剪報，咁就梗係交又死唔交又死啦。今時今日都仲想用咁嘅詭辯來敷衍食客會唔會天真咗啲呢？

跟住我就主動走返出間餐廳。走嗰陣抬頭見到「以食客為本」五個大字，真係覺得有啲諷刺。一邊講以食客為本，另一邊就喺度話食客咀刁難服侍，變臉速度之快簡直係四川京劇級數。出得來開餐廳食客咀刁就預咗架啦，唔通今時今日仲諗住扮找數就得過且過？喺人哋想要嗰陣做唔到人哋嘅要求，你咪心虛少少認衰仔囉。講真，邊間餐廳真係做到有求必應呢？但你喺而家人喺要求嗰陣唔做，到無人要嗰陣就煮返出嚟，仲要用埋哂啲「煮又鬧唔煮又鬧」嘅歪理來逼食客硬食。唔通你咁又叫俾食客有得揀？如果係唔係都無得揀嘅又同共產餐廳有咩分別呢？

食客嘅意見的確唔一定要聽，因為當中一定會有無理取鬧嘅。但你喺決定聽唔聽人意見之前都應該要睇返民心走向，當愈來愈多人反對你投訴你嗰陣，就代表你真係做錯咗。而唔係望住支持者愈來愈少，就用歪理或者怪責人哋記仇煽動來幫自己脫罪。事實上，平時幾間餐廳都一直互相攻擊。今次竟然突然全部停手轉為攻擊你，由文火派到武火派都有份，你就知今次真係有問題啦。最後我都真係要講返句「屌！民主黨真係無撚用架！」。