夜深的郊野公園燒烤場，一班男女正在 BBQ。

「不如我哋玩碟仙囉！」發起人正是叁叔。

「都好喎！」年輕的文仔和議，但聯哥有點猶豫。 

膽小的雯菁和妹珠表示反對，眼見有機會在心儀的妹珠面前逞英雄，阿進舉手讚成。

碟仙最少要有四人，三人望向阿港和蔡冬。

「我有名碟仙死士，碟仙呢啲嘢我睇唔少，阿港！你嚟，我喺旁邊同你打氣！」蔡冬拍著阿港肩膀鼓勵。

「哦……咁好啦……」阿港對碟仙沒有任何立場，反正得閒，試試無妨。

「嗱，玩碟仙呢，就要有步驟，喺我講步驟之前呢，首先要同你哋做少少心理準備，『尊敬、莊重、非蔑視』就係我哋嘅大原則……」叁叔希望大家用最傳統，最正道，一切皆在可控制的範圍內進行，卻被阿港開口打斷，「天光啦！係咪玩㗎！」冷不防被人喝止，叁叔只好收聲。

由於事出突然，阿進和聯哥找來報紙和水樽蓋拼湊。

「得唔得㗎？」妹珠對這個「攤子」能否請到碟仙起疑。

「喂！你哋唔准用風月版！」雯菁對這些特別敏感，馬上找來校園版代替。

「咪又係字！碟仙唔睇圖㗎！」阿進搶白，雯菁嗤之以鼻。

「嗱，大家將隻中指輕輕掂住個蓋，之後就一齊請碟仙上嚟。」叁叔說完，文仔，阿進和阿港，亦把手放上，口中一齊唸唸有詞。

不久，燒烤場吹起一股陰風，風聲和樹葉聲聽得人毛骨悚然。

「嘩！唔得啦！呢個場真係好邪，我誤判，喺度同大家講聲，我走先。」自詡碟仙死士的蔡冬，一溜煙跑了上山。

其他人看得目瞪口呆，反正一開始就對他不太有寄望，大家就繼續。

「嚟料！」文仔感到有股力量把樽蓋浮起，興奮莫名。正當樽蓋想浮出本位時，叁叔說了一句，「碟仙碟仙，請你歸位。」樽蓋就停了下來。

「你搞乜呀？！」阿進急問叁叔。

叁叔收起樽蓋上的手，好整以暇，「我發起玩碟仙，只係想大家感受一下，貫徹對鬼神『尊敬、莊重、非蔑視』嘅原則。從來無諗過真係要請佢上嚟，既然頭先大家都感受過，我宣佈，儀式結束，大家返屋企。」

「癡X線！」不只性子急的阿進，就連阿港和旁邊的妹珠也受不了而爆粗。

「唏！你唔玩就等我嚟啦！」聯哥也按耐不住，閃身上前，頂替了叁叔的位置。

「喂你哋無人走呀？唔好啦，咁夜一個人搭車好悶㗎！」在場無人想理會叁叔，無奈只好一個人悶悶不樂地離開。 

「玩還玩，我哋都要跟返叁叔『尊敬、莊重、非蔑視』呢個大原則。」聯哥對其餘三人表明立場。

「點都好啦！」阿進由最初只想逞英雄，到現在真的想玩碟仙。

「有你哋兩兄弟一齊上場，無有怕啦！」阿港也信心滿滿。

很快，碟仙再次就位。

第一條問題，由聯哥發問，「碟仙碟仙，我想問你……今日係舊曆幾多號？」

「你問乜呀？」阿進聽到這條低水平問題，忍不住又上頭。

「我哋要堅守原則，問呢啲問題就一定唔會有事。」聯哥理直氣壯地回應。

「都唔係問得咁低能下話。」冷不防阿港也加入聲討，聯哥吃了一記悶棍。

「咁不如我問啦……碟仙碟仙，你知唔知妹珠條底褲咩色？」文仔搶著發問。

「唔准問呢啲！」雯菁又一次發揮她的監察本領。

「聯哥我幫你睇實佢哋，唔俾佢哋亂咁嚟。」雯菁對聯哥早已芳心暗許，今次當然要在聯哥面前施展渾身解數。

「到我到我。」阿進終於等到自己發問，「碟仙碟仙，我想問下你係幾時……哇！」阿進一聲慘叫，原來是雯菁用力地捏住他手臂。

「我哋要堅守『尊敬、莊重、非蔑視』呢條原則，你唔可以問佢幾時死㗎！」雯菁邊說邊打阿進。

「癡線！我想問佢幾時出現喺呢度咋！」阿進用另一隻手擋格。

阿港滿以為今次終於輪到自己發問，突然間水樽蓋離開本位，飛快地在報紙上亂竄，四人狼狽地扭動身體配合。

「我，唔，得，閒，同，你，班，契，弟，混，吉。」

之後水樽蓋爆開，嚇得眾人把手縮回。

一直旁觀的妹珠嚇得哭了出來，邊哭邊嚷著，「我唔要玩碟仙，我要瞓覺！」 

文仔最怕妹珠的哭鬧，也和議著，「都玩咗咁耐，又真係試過玩到，下次準備好啲先再玩過，走啦！」

「都叫你唔好亂嚟㗎啦……」其實聯哥這句說話沒有指明是誰，但雯菁馬上把矛頭指向阿進，「大家玩得好地地，一日最衰都係你！」之後追打著阿進。

「喂八婆你癲夠未！」對方始終是女生，阿進只得硬食。

這時候，蔡冬再次出現，「各位，我行完一輪山之後，又返嚟啦！今次我親身同你哋玩碟仙！」

「你慳啲啦！天光啦！玩條毛呀？！」聯哥也接受不了這種「離開是為了回來」。

「你條臘腸而家先返，把鬼呀！」阿進氣得把蔡冬綁在樹上，「費事同你班友癲！」說罷就一個人走了。

阿港看著這一班人胡胡鬧鬧，也跟著獨自離去。心想，靠他們的話，應該一世也不可能成功請得碟仙，還好他親身見識過碟仙的力量，故此，他相信，只要找到合適的伙伴，就一定能成功請到碟仙。