第十位
口罩港！
林鄭公開招標、之鋒攞嚟眾籌、元秋攞去蒸煮

2019年，好像個個香港人都想要發聲，一到2020年，大家就收聲了，因為口罩封嘴。口罩變成香港人的拘束帶，暴政變了個臉，換上瘟疫之名，大家就服從了。
年頭鬧口罩荒，到年尾卻說口罩行業現泡沫。
年初全球缺口罩，林鄭尋找口罩的方法，居然是公開招標，價低者得。元秋都慌了，居然教人用蒸焗方法消毒口罩重用，之鋒率先喺海外班到口罩，唔係派係要嚟賣，叫大家當係眾籌。
一輪擾攘後，才發現口罩是奴役工具。

第九位
幾百萬形象工程，變成王百羽咁樣

自稱坦克車的王百羽，參選立法會申報用了489萬選舉經費，其中不少用作形象設計、化妝。
及後王百羽被控詐騙，這單官司的關鍵，相信會係王百羽個樣，法官需要判斷，佢呢個形象設計，花多咁多錢值唔值得？又，真係畀咗咁多錢都係咁嘅樣，因為生成係咁，又犯唔犯法？

第八位
黃絲區議會大勝，選班議員做城管

去年區議會選舉，黃絲宣告大獲全勝！
結果，一班黃絲區議員，專門去捉超速駕駛，在巴士站捉街坊有冇戴口罩，落公園驅趕玩啤牌阿伯，為限聚令執法。
用選票選出一班城管，就係黃絲嘅勝利。

第七位
買股票撐蘋果

肥佬黎被拘捕，警察入蘋果日報搜檢，黃絲帶為撐肥佬黎，居然使出奇招：買壹傳媒股票！
然而，壹傳媒又唔係啱啱上巿，你買佢股票，D錢唔會入到佢袋架？你買到明明係街貨，事實上只係幫人高位接貨，而派貨畀你嗰個，分分鐘其實係藍絲。
就連蘋果日報都公開呼籲，想撐蘋果不如買返報紙，買股票撐唔到架。
股價開始由高位插手，連登仔開始恐慌，出POST求助。唯有何韻詩，宣稱「再跌我再買」，然後壹傳媒就繼續一路跌，如果何韻詩真係愈跌愈買，佢可能已經成為大股東了。

第六位
扮畀人拉，然後畀人拉

黃絲最愛矯情賣小強，支持政治人物，從來唔係睇邊個做到野，係睇邊個夠慘。
如斯風氣下，黃絲政治人物，總愛顯現自己被迫害一面。黃絲區議員盧俊宇，為求關注，居然出POST宣稱自己被捕。
但警察馬上澄清，從來冇拉過佢，盧俊宇後來也發帖指一場誤會。
然後，盧俊宇居然因為謊稱被捕一事，真的被捕了，求仁得仁。

第五位
黃色批鬥圈
龍門告鳩員工，員工叫醒Ivan

黃色經濟圈成立以來，黃店之間鬥爭不斷，相互鬥黃之餘，又互指對方吃人血饅頭，花生日日派。
黃店龍頭龍門，更成眾矢之的，對家連同前員工，一起聲討！事件最後鬧上公堂，龍門老闆狀告前員工誹謗。
同時，另一知名黃店，卻因為請了大量「手足」，卻無法叫「手足」開工，甚至被「員工」叫老闆Ivan醒下啦！
搞咗大半年，黃色經濟圈最成功之處，是發展成娛樂圈，填補了報紙C版的空虛。

第四位
滅時潘圓咕碌，身體自主玩肥仔

號稱主張「身體自主」、「情慾自主」的黃絲女權KOL（滅時潘、圓咕碌），約會肥仔開房玩SM直播，聲稱是因為肥仔私信性騷擾，又話肥仔係藍絲云云，要開住直播整蠱佢。
結果，因為自己開直播，通曬天，警察上門拘捕兩女。
更好笑是，圓咕碌事後發文割𥱊，話自己雖然只係「旁觀」都難辭其咎，又話自己叫過滅時潘唔好咁做⋯⋯盡顯黃絲女權本色。

第三位
巿民短期內都不可以在餐廳坐下來吃飯

瘟疫政治下，限聚令讓餐廳無曬堂食，慘絕人寰，餐廳慘，巿民又慘。
本台主持阿藍，居然成為了「巿民」代表，每一次電視新聞報道限堂食令，都會播放阿藍最後一次在餐廳堂食的畫面，阿藍面容肅穆，強忍淚水勉強扒梅菜扣肉飯的表現，讓不少香港巿民共鳴落淚。


第二位
黃老闆悲歌
又要出糧罷工，又要WFH

黃店老闆阿K，2019年被社會運動所感動，全力支持公司的年青員工參與抗爭。
結果⋯⋯整間公司上下好像當了抗爭是正職，以為阿K是出糧畀佢地搞運動的，公司全面失控，員工要求老闆出糧讓他們參與罷工，而且罷工以外的時間，也應該響應政府呼籲Work From Home。
反政府時就罷工，聽政府呼籲就WFH，咁到底幾時返工？

第一位
邪神Sherry

2020年所有衰野，都係Sherry引發的。

笑死朕第518集：
2020十大笑死朕事件
http://www.passiontimes.hk/prog/5/518