陳為廷今日出咗個 status，講見到金鐘尋日清場嘅感受，有個 point 講得好啱：「只是覺得，回想起來，好像所有過去參與過的運動，從來也沒有過什麼『勝利』的感覺。」

呢個心態，至為重要。

香港班左膠社混，點解咁可惡，就係佢哋搞嘅抗爭，track record 差之餘，仲要自欺欺人。左膠社混成日喺將來嘅運動，都搬返呢啲 CV 出嚟，將失敗變成「階段式勝利」，至為可憎也。

一來佢哋搞大台，壟斷社運，散佈悲情；二來嗰種腐朽嘅「和理非」，不斷將自己「敗部復活」，咁先至搞到香港不斷往後退。

而專橫政權就係睇通晒佢哋啲技倆，於是變得愈來愈專橫，亦更加變得針對性地打擊抗爭者，令香港更加翻身無望。

要抗爭，就要虛心學下臺灣人。唔係剩係識得去現場打卡、鳩坐；而係要 get 到人哋個精神，要識得保持清醒，唔好以為自己贏咗，自己呃自己。

朋友話，我係雨傘革命之後係樂觀咗。我係相信會贏。但要記住，唔係而家就贏咗。

「將來會贏」=\=「而家贏咗」。

_________________________

被清場後，我想講兩點：

1. 勿玩膠、勿嘉年華化

清咗場係令人失望，後續要做嘅事仲有好多。我唔再詳述。但一定要保持恒久嘅警覺，抱住肅穆嘅神情去面對抗爭。「金鐘的最後一夜」搏晒老命玩膠，玩嘉年華，我係好反對。出得嚟抗爭就要抱住做大事嘅精神，仲喺到玩玩下，政權都唔會認真睇你爭取嘅訴求啦。

2. 摒棄英雄主義，唔好造神

陳為廷同林非凡都係經歷咗好多抗爭，佢哋係人少少嘅環境都自己衝出去做。有興趣想學野嘅，自己上 Google search 下「士林王宅案」、「反媒體巨獸」、「苗栗大埔案」，睇下人哋點做野，會唔會咁鐘意攞光環。做野，就要做實事，唔係下下爭住上台、見報、做訪問就好。

總結：

想學臺灣人咁「出關播種」？臺灣有民主選舉，終於將親共藍營趕出地方行政。香港？隻689兒皇帝仲穩如泰山哩。香港人仲有排都未到關口，但我相信，肯做、行啱條路就會贏。That's it.