今日係世界人權日，亦係臺灣美麗島事件35周年嘅日子。你睇到呢張相，就係港人熟悉嘅高雄捷運美麗島站，光之穹頂。

美麗島事件，係臺灣走上民主路嘅其中一個里程碑。見到今日《蘋果日報》quote 返呢段歷史，映照今日雨傘革命被清場之際，我係感到唏噓。

好多香港人都唔熟呢段臺灣史，其實呢段對香港好有參考價值。可恨香港嘅呢一代人，喺英治時間仲有今日中共殖民之下嘅歷史教育，係完全無接觸過呢段臺灣主體意識嘅抗爭。我好記得，中學入面嘅中史只係以中華人民共和國做 timeline，而臺灣歷史部分，由國民政府遷臺之後，教科書係一隻字都無提。

但臺灣人今日成功走上民主民權嘅路，就係由1947年二二八事件開始，受白色恐怖籠罩，到七十年代中壢賄選、陳文成事件、林義雄事件、江南案，全部都係人民流血，暴政殺人，臺灣人係過咗幾十年好艱苦嘅日子，先迫到人民奮起抗爭。

香港班和理非社混，講唔講得出呢堆歷史？佢哋熟少少書，就唔會 quote 來 quote 去都係甘地同馬丁路德金啦。而根本甘地同馬丁路德金嘅和理非，係人地基於有啲人性嘅政權嘅統治，先有空間爭取嘅。今日呢個港共政權都無人性嘅，點會 work？

而由928黑警射催淚彈開始，到黑警扑爆人頭，無定向拘捕，再到有人篤灰玩白色恐怖之後；我睇到成個大勢，係香港班和理非會大敗。呢三十年嚟，如果同中共可以坐得埋好好傾，應該就唔會發展到今日呢個地步。

好多人話，「咁樣走上激進之路，社會撕裂，好痛心」。但係，即使無人出嚟抗爭，唔通而家香港呢個土共政權又會畀好日子你過？香港呢個社會，早就係中共派689呢個兒皇帝當權嘅時候，將本土建制派都撕得四分五裂，何況係所有香港人嘅福祉？

_________________

香港人，要放低所有幻想。今日睇美麗島事件呢段歷史，除咗用學習嘅心態，仲要沉澱。將呢次雨傘革命失敗（記住，係失敗，唔好自己呃自己有咩階段式勝利）做經驗總結。政權亦唔係死古古好似打機怪獸咁企定俾你衝，下一步就係暴政秋後算帳嘅時間。之後嘅運動你可以超展開做「遍地開花」；但要記得，對家暴政，一樣可以「爆你菊花」。而時間係公平嘅，大家都喺同一個四次元，差在邊個靈活啲，邊個捉得啱個勢，就邊一面贏。

記住，唔好驚，唔好怯；亦唔好等所有人都要「人心轉變」先做野。每一個世代嘅浪潮，風一起，你搵到浪尖，就可以站立喺滑板度，將你帶上岸。而所謂大多數人，只係大海入面嘅小水滴，佢哋都係等緊個浪有動能，先可以衝上岸邊。

借史鑑今，臺灣人美麗島事件之前大部份時間，人民係受咗好多苦難，先推到上抗爭嘅浪尖。我好希望今日大家睇呢段歷史，要認真啲，詳細啲睇晒前文後理。唔好單單以為，香港今日班人俾警察拉，跟住律師抗辯，就可以「辯論」出一啲真理同民主出嚟。美麗島大審之後，雜誌社班人係坐好多年監，受好多苦。點會好似有啲人咁，諗住攞光環自首，但竟然係「老人院都唔收你」嗰種格局俾人踢返出嚟。

你問，我哋之後可以做乜，what's next? 你咁有心睇得晒我篇文，一定係有自己想法，有理念嘅人，唔使我畫出腸架啦。準備好，就風起了，大家迎接大時代嘅降臨啦。