雨傘革命已超過一個月，每日嘅警察記者會都阻住我睇《我們這一家》，不過算啦，身為一個關心香港嘅人，就即管睇吓佢哋講乜。不過日子耐咗，開始發覺無論係許Sir定江Sir，講來講去都三幅被，不過我都戥佢哋慘嘅，明明冇嘢講，都要撐起成個記者會。久而久之，發覺愈來愈唔對路，開始連網上傳聞都攞出嚟講，一味靠嚇，認真九唔搭八。

近日，可能網上傳聞都嫌太流，開始發現佢哋連網台都聽埋，真係辛苦晒，今日場記者會，許Sir無啦啦講話網上有片段流傳，有人向幼童灌輸有關警察嘅非常負面訊息，將警察講成壞人，認為係唔負責任喎，又話市民應該向子女灌輸警民合作嘅重要性。

網上有啲咁嘅片段？我日日都有上高登同Baby Kingdom，都唔覺有喎，不過啱啱醒起，尋晚《熱血時報》嘅《熱血親子團》都有提及相關嘅內容，講到如果小朋友以當警察為自願的話，父母應該抱乜嘢態度去面對。

許Sir隔空回應《熱血親子團》，我諗主持水媽諗都未諗過，可惜警方聽啲唔聽啲，水媽明明話唔能夠讓小朋友直接感到警察就係壞人，否則遇到有需要嘅情況都唔肯去求助，最終只會害咗班細佬。

其實警察記者會都唔係第一次隔空回應《熱血時報》節目，10月30日《大香港早晨》講到「請不要提前自首」，警察公共關係科高級警司江敏強喺當日嘅記招，就刻意提及「有非法堵路嘅人士表示，唔會承擔法律嘅後果」。

其實我想講，警察都係唔好對網台節目太上心，有啲網台，全部節目都係講花生嘢，如果個個聽晒當收風，我恐怕警方會好容易被誤導囉。其實，差人只要做好自己本份就夠，唔駛太介意人地點睇佢，香港人眼睛係雪亮嘅。

（無綫新聞截圖）