電視發牌無端端有上限，忽然三揀二；但係人口政策，香港連移民審批權都冇，仲要人口不設上限！其實689喺北京發言，已經透露咗呢個政策方向，佢用「萬能轉插」唻比喻香港，即係講到明香港係畀人點插都得嘅，前又得後又得，堅守人型蜈蚣的中堅位置。

收回審批權無望，但我相信港喱對呢件事，無乜睇法。菲律賓總統當你香港係奴隸城巿，求其搵個巿長耍你哋，相信港喱感覺都不大。反觀電視發牌事件，因為keep住有藝人發聲，持續有花生，所以就算廣場留守乏力，但依然會受傳媒關注，港喱高度關心。

王維基精甩尾，係記招講明件事唔關中央事，一句「政策大，定係特首大」，單純將矛頭指向689。呢條友話自己唔識政治，其實政治智慧高到爆。然後，行會成員自己放風，話行會成員其實想發三個牌。立法會主席，又放話，特首一個人，可以推翻行會決定。一個二個轉身缷膞，成個管治班子一個接一個跳船，689而家好似真係變咗萬能轉插，作為棄子，開放任插。王維基而家成個人民英雄咁，但佢始終係生意人，仲要係政協。所以第一件事，就係撇除中央關係，淨係將矛頭指向689，留下左一條極具政治智慧嘅伏筆。

如果，件事發展落去，中央忽然有官員出聲，話電視業多尐競爭好喎。如果咁樣發多左個牌，咁中央咪變左賢明聖上？當然，呢個可能性好低。但係，就算發唔到新牌，689係呢件事受晒靶，都係佢一人受插。一旦再加多一單「唔關中央事」嘅野發生，中央立馬斬689，換個林鄭上去，港喱實拍手稱慶，跟住林鄭順手搞掂埋政改。

喺香港，任何政治、社運事件，都要回到「對抗港共」之上。審批權無法收回，奶粉、床位、學位問題，都無法解決；特首被中央欽點，香港必須矮化，菲律賓總統當你香港臭四；電視發牌朝三暮二，破壞程序公義，行政大陸化！所有嘢都關中央事，所有問題都係關於「港人治港」無法落實。

所以，一定要將所有問題政治化，然後所所有問題指向同一政治議題：「港人治港」！我哋唔能夠接受，因為一男子考慮，一個港共指派的男子，而剝奪了香港人選擇電視的權利！

矛頭必須指向中央！香港人有權爭取自己想要嘅電視！

咁樣！

點解要將hktv事件，政治化到呢個地步？因為不論係東北圈地、高官貪腐、菲國侮辱港人、人口政策不設上限，呢尐議題，都無打動港喱！無電視睇？屌！上街啦！呢陣東風，一定要借，但借左呢陣風，唔好單燒一隻船咁浪費，要火燒連環船，燒到中央為止！

雖然上街第一波完咗，但仍然可以繼續做輿論，港喱仍然會關心，藝人仍然會發聲！

有尐朋友會擔心，咁咪無端端將王維基變左民主英雄、群眾領袖？（大班最驚）但朋友們，唔駛驚，因為無論你哋推唔推，佢已經係英雄？再畀政治光環佢，驚唔驚佢會騎劫左成個運動？更加唔使驚，只要你下下都將運動上升到「反共」、「自治」，呢個英雄，佢先唔敢做。佢係生意人，唔係黃之峰、戴耀廷，你畀政治能量佢，佢都唔敢要，佢要做傳媒大亨啫。各取所需。

所以大家要借呢個勢，盡一切努力，將發牌審批權同移民審批權扣埋一齊，將發牌事件同高官貪腐扣埋一齊，將發事件同港府大陸化扣埋一齊。

盡你所能，借東風，政治化！