對於梁特首的「政策向窮人傾斜，步向福利主義」之說，我即時的反應是「我不是乞兒」！

香港人出名有拼博精神，雖然偶而會偷懶玩玩電話食支煙，但還是紮紮實實的返工出糧，用一萬幾千維持生計然後交稅。

雖然我唔夠有錢所以不能安居樂業，然後又因為我唔夠窮所以上唔到公屋同無福利可言，但我仍是日做夜做，努力生活。

今天，我們仍是用香港人精神爭取一個平等自由的權利，每天參與運動係街頭日坐夜坐，不是為了用權利去提名一個會讓我們變成飯來張口的人當特首。

我追求的只是一個正常的生活環境，我不想藥房多過7仔；劏房呎價貴過豪宅；港鐵年年加價但日日都壞車；隻狗隨地解放你都會罰個狗主$5000啦，但又要我哋包容隨地解放的厚多士，到底係政府怕收唔到數？定唔知個罰款人姓甚名誰？

其實，大家都係香港人，如其曲線污衊香港人的雨傘運動是為了集體偷懶，怕我們變成丐幫學會打狗棍法，不如你直接回答我「嗰5000萬係用來交罰款定買糧」啦！