昨日原本的計劃是教會在政總崇拜，然後留守舉辦嚴肅會。我兩點左右到金鐘，所有往政總的路都封了。經過一輪了解、考慮，我決定取道分域碼頭街行人天橋、在那兒聚集。抵達不久，我見到橋下有人拍手，原來是因為有車慢駛支持。有人想迫出馬路，但都被交通警趕回。我見到橋下氣溫漸升，我和同伴R說「喂，無理由由佢地孤軍作戰架～～」於是我們旋即到馬路旁，時維下午3:30-3:40之間。原來有人拿著「慢駛」的牌，叫司機慢駛，其他人也叫路過司機慢駛。我也幫手叫呀，叫啲司機「壞車」。忽然，有一架貨 van 真的駛得好慢好慢，群眾拍手歡迎之際，忽然，有人衝了出路中心坐著，我也立刻響應，十秒內已經有20-30人坐馬路（我係頭20個之內），好快就個百人上了馬路。加入的人很多，很快，三線全堵。有人呼籲開返一條線，有人反對，對抗了一會，群眾都希望「留一線」。不久，就有人叫人行。我心諗，搞乜呀？原來係行返去政總門口。咦，咁又好喎。於是我們便佔了兩條線向前行。行吓行吓，兩條縮回一條。我覺得唔對路，我停下，和其他途人講 「唔可以越行越窄！要行雙線」。果然，只要我們企硬，交通警無我哋符，我們行返闊條路。行了一會，到了政總門口，基本上只差一條防線就可以衝入去。我們停下來和警察對峙，時坐時企。轉眼間，原來干諾道西行線都突破了，六線全堵，那是士氣最壯之時。因為我們體驗到原來只要敢做，抗爭是有出路的。

就在此時，李柱銘、黎智英、陳淑莊等出來，大批群眾歡迎。李首先發表，他說「我們保持了和平、秩序、愛，今日贏了一小仗」，在場有人罵他們佔光環、有人大叫「未贏！」，我就忍唔住企起身大叫李柱銘「收聲」。點解？喂，昨日係因為我哋唔肯守秩序，所以先霸到馬路架！你做過啲咩呀？你施施然走來接受群眾掌聲，根本就不配。不滿之聲零聲，但很多市民叫「團結～團結～」。Fine。

過了一輪。氣氛開始緊張，人們開始穿著保護物（遮、雨褸、眼罩、保鮮紙、口罩、毛巾）。忽然，我見到白煙在我前面射向天，係催淚彈。我在政總「地盤橋」和紅十字會總部中間位置，無人諗到一來就係 tear smoke。全部人退後，但都幾有秩序，不停有人提住「慢慢，小心」。隨後又有幾發。在場無一個人預計到這樣的事，很多人都中了煙，我都中咗，好應。感覺先是刺眼，然後喉嚨很「濁」很想咳，口裡也怪怪的，總之整個耳鼻喉都不好受。我退了20-30米後，才處理。我見到很多人都和我一樣中煙，大家都急忙洗眼、漱口、飲水。我遇到一個醫護幫我滴生理鹽水，很快恢復過來。恢復了，大家狂__警察老母，很多人很激動，說警察無人性。而我就說「我第時一定唔肯俾我個仔做警察」。Anyway，全部人在第一次放煙之後更勇武，衝得更前，對峙面在政總門口。之後其實都係咁上下，放煙，我哋就走，然後處理，然後又返去__警察，繼續對峙。印象所及，入黑後，有人說從灣仔方向好大鑊。我們又過去，嘩，我堅驚。我見到一大隊「防暴警」（唔知係咪咁叫）拿著長鎗，三四人一排操向政總方向。最恐怖的，是他們拿著「速離否決開鎗」那邊旗對著我們。我哋一面驚，一面梗係上前頂住佢啦，舉住手，開遮，唔反抗，有人想掟水樽，但更多人喝止。點知，佢哋近距離掉催淚彈，嘩，嗰次直頭係喺我兩米之前一個，一米之後一個。唯一生路是拔足狂奔。過到去政總，一會，又掟一次，又要走返去紅十字會嗰邊。那次我中得好甘，choke 得好辛苦。Anyway 咪又係咁處理。之後，我見到灣仔那邊，已經有三幾架大警車 road block 了，心諗，大鑊，戰線越來越細，佢哋諗住縮窄範圍。

在我們療傷和計劃下一步之際，又一個。今次吹到去紅十字會條後巷，我哋好多人被迫沿後巷走。我去到分域碼頭街，見到只有零聲幾個人，有啲係坐喺地下療傷中的。但係就有一排40人以上的警察，他們見到我們走出來，施施然一起戴豬嘴，心諗，仆街，佢哋準備要放煙了。他們叫我們從某一邊離開，否則乜乜物物。

我們各自決定去留，有一友留，我和另一個走。我留了些物資，大家打了個眼神。我和另一位就向灣仔進發了。一面走，一面很難過。自問昨日都算好勇武啦，但面對真鎗的威脅，我還是害怕得要死。我一面怪自己離開，一面又安慰自己問心無愧。在走的時候，路上很多人希望加入，我和朋友給部份遇到的人講解狀況。見到前仆後繼，加上政總門口氣勢不退，我覺得，其實有得贏的。越多人出來，大家的犧牲越小。真的，在自己可以的範圍內盡做，就好勁架喇。

總結其他其項觀察，我覺得昨日極多假消息。咩警察幾點會做乜呀，咩最遲幾點清場呀，好多都係流的，係鬼放出來嚇我們，和我們的家人。這個大家要好小心防備。第二是今次的抗爭，一定係近年來最勇武的，點解？我諗係因為無咗「大佬」囉，無人好大支野走出來要號令天下囉。大家用腦用智慧加經驗，大聲一叫，好的 idea 就會有人跟。呢啲先係人民抗爭呀。昨日無大台、無 figure head，大家的合拍度極高。

大家在自己崗位盡力而為。