我個 Page 簡介有寫我任職大公司極小職員，引用陳鑑林式說法，我喺香港一間「大嘅公司」做野嘅。咁我任職間公司到底有幾大呢？基本上月尾，公司出咗份糧畀我，我衣食住行都會「鼻毛可避」畀返錢公司，形成完美嘅左手交右手「無天理」循環，咁我諗大家都知……嗰間公司架啦。

而每年暑假呢間大公司不費吹灰之力，都會吸引咗好多應該係中咗降頭嘅大學生嚟做暑期工。今日又有一個入世未深嘅大學生來報到。佢當然係參考咗 TBB《愛回家》嗰間史林廖賴律師事務所嗰啲律師嘅造型嚟返工啦，真係好 professional，而佢見到我哋一身便服就問：點解你哋喺大公司做野都著得咁 casual？

哈哈哈哈哈哈哈，我必須承認我有好賤格地笑佢，因為我冇諗過佢會問出口。我笑佢，因為我曾經都好值得被恥笑。我完全明白大家一定對「大嘅公司」有好多幻想，因為想當初我第一日返工，我心入面嘅 background music 就係TBB《創世紀》個首：「來給這世代留念，宇宙懷念，信心不斷，信念長存，讓我家園心內作興建，那管多少辛酸已獲勝算」，我當時諗，我仲唔係下個葉榮添，我發啦我。

我也有做暑期工嘅小時候，也有很多很多的幻想：

• 喺老鼠樂園做過暑期工，我幻想日日都進入「奇妙嘅世界」。但當我睇到白雪公主係後台講手提電話，同埋泰山冇搵條咸水草遮住重要部位，著返現代嘅牛仔褲，就一切幻想都幻滅晒。
• 大學三年班嘅暑假，去咗電視台新聞部做暑期工，原來真係有坐枱嘅男主播，上身著西裝，下身著波褲，真係九唔搭八得來盡顯個性。所謂上半身官仔骨骨，下半身甩皮甩骨，大概就係咁。

大學畢業之後，我依然都係充滿幻想：

我第一份工係一間傳媒嘅記者，我必須要承認我真係好白痴，我覺得冇可能唔買返件《今日睇真D》嗰隻，睇個樣有80%似避彈衣嘅記者背心，有咗件背心我仲唔係一個完美嘅記者……

「係時候醒啦喂……」

今年暑假正好係我大學畢業三年，我冇再幻想可以成為葉榮添，每日行入公司首 background music 已經轉咗做黄伊汶嘅「心情仍然很爛……」，日日都會以界乎行乞與拎綜援之間嘅造型返工。開會見人我先會著返枱底嗰 pair 半腳踏實地高踭鞋，以及搽返來自X那星嘅千頌E唇膏。我係好肉酸，但你話有咩爽得過，係枱底除咗鞋，一路做野，一路用左腳腳指R右腳腳背。見到啲暑期工仲未俾阿姐玩殘，彷彿有支黃色螢光筆 highlight 住佢哋，我真係覺得「年少多好」。

P.S. 其實返工著咩衫，係要根據「高踭鞋幾高都唔好高過阿姐」theory，高調得來比阿姐低調就最 perfect 啦。

（本文原載於作者面書專頁）