政府上星期突然連炒兩位高官，本來公眾談論焦點都喺「垃圾桶」劉江華又升一級做到民政事務局局長，一日收入萬五羨慕死班「廢青」，直情係「廢青」發奮向上嘅目標。殊不知，立法會主席曾鈺成喺佢細佬曾德成疑似被梁振英逼走之後連日發炮，完全同佢平日對住記者冷靜，高智商形象顯然不同，向港人大派花生。日前仲對住記者話，如果自己後生十年，一定會「忍唔住道氣」，仲會企出嚟參選特首「睇吓你點整我」，矛頭直指梁振英，究竟點解曾鈺成今次會一反常態，全面開戰咁款？

事情返番去2012年特首選舉，當時唐英年正受婚外情同僭建風波所拖累，梁振英好有機有贏到特首寶座之際，政圈一直傳曾鈺成好想出手參選。但偏偏當年曾鈺成向外宣佈考慮參選特首嘅一個星期後，有傳媒爆料話梁振英親自打畀曾鈺成，直接要求曾鈺成退選，仲嚇佢講已經掌握住關於曾鈺成當年喺培僑任職時嘅黑材料，最終，十日後向傳媒宣佈放棄參選，同時主動對外講「梁振英先生兩次打電話畀我，話佢冇、亦唔會搞我黑材料」，間接證實梁振英真係打過畀佢，而黑材料一事亦不是空穴來風。

喺政改保皇黨「等埋發叔」一事之後，引發嘅 WhatsApp 群組對話內容外洩，唔單止令保皇黨內訌呢個公開嘅秘密爆咗出嚟之外，曾鈺成亦都被揭發其實一直「操盤」參與保皇黨整個投票過程。政圈亦有評論話背後牽涉一場2017年特首選戰嘅角力，爆料人要令曾鈺成建立多年嘅中立開名形象「一鋪清袋」。雖然佢已經多次表明唔會出嚟選，但筆者懷疑呢件事係要再提一提曾鈺成，你咪喺度搞事，同我乖乖地做立法會主席，唔係連立法會主席都唔畀你做。

其後《AM730》頭版刊出曾鈺成證實2012年佢表態認真考慮選特首嘅時候，佢立法會主席辦公室驚爆出竊聽風雲。唔單止懷疑被人暗中喺辦公室裝置竊聽器，佢屋企外亦有可疑人士疑似監視。由於佢辦公室唔係等閒人仕可以隨便入去，可想而知件事有幾嚴重。更奇怪嘅係呢幾件事一直去到梁振英正式當選之後先忽然消失。背後嘅一場權力鬥爭，相信讀者們都心中有數。

筆者一直覺得曾鈺成並不是甚麼高深莫測嘅政客，同港視電視劇《選戰》中智叔所飾演嘅振民黨主席宋萬山亦差得遠。只係佢一直生活在一班豬一般的低智保皇黨隊友身邊，先令佢這樣一個人都捧上神枱。但面對梁振英這樣的對手，恐怕曾鈺成也惟有同佢同歸於盡一途。所以筆者全力支持曾鈺成企出嚟選，同梁振英攬住一齊同歸於盡，幫自己幫細佬報番仇。

（商台片段截圖）