因小見大，望下地鐵上既資源分配，已經睇到好多野，有警世之效。

有啲人按自己需要，決定坐唔坐。君不見好多時讓座，受讓嘅婆婆都話一個站啫，唔使坐啦。有啲人坐低咗，隨時都肯讓返出黎。對唔住，係某啲人眼中，地鐵就係戰場，成王敗寇，叢林法則，無位坐只係失敗者。

要係地鐵佔得一席位，首先要有野心，繼而心狠手辣。見位就鑽，哪怕佢只係坐一個站。連人帶篋撞開你，眼角都唔會望你一眼。心無旁䳱，致勝之道。我環顧地鐵，只見坐得係位嘅，都會目光如炬咁扶住皮篋拖把，儼然手握權仗既王者。

當然啦，我只係講緊地鐵搶位，係引伸唔出其他社會資源既分配問題既。特首教路，個別事件係唔值得評論既。

為咗搶位，你可以去到幾盡？我每日一起身第一件事，就係諗住搶位。迫緊巴士，迫緊地鐵嘅時候想搶位，片緊豆腐嘅時候想搶位，沖緊涼抹緊面洗緊身嘅時候都想搶……

（圖片來源：Tom Page via Flickr）