我好滾動，好多謝今日PM我嘅一位朋友仔，佢特登通知我今日TBB播叮噹，而且佢話今集技安戲份好重，叫我睇。
　
但呢位朋友仔話冇左全叔把聲，真係好sad。

****************************************************
　
喺度推介一本書畀大家，係David Eagleman嘅《死後40種生活》，佢喺呢本書假設人死後40種可能性。其中兩種死後生活，令我感到好淆底，如果死左真係咁，真係唔想咁早死。
　
一‧ 依照一個好大鑊嘅次序重新活一次...
　
呢種死後生活，死咗要重新經歷過生前所有嘅一切，但個次序係要重組嘅：
　
→ 你要一次過無間斷訓返晒生前訓覺時間嘅總和，一訓就訓幾十年
→ 一次過無間斷痾屎痾幾年
→ 如果你好好生養咁你好大鑊，要一次過無間斷連續生幾次仔
→ 一次過做愛，做返晒你生前做愛時間嘅總和，唔好以為好爽呀，如果你係加藤鷹就真係「DA 咩」
→ 如果你係汪明荃可能就要連續「華麗轉身」轉幾年架
　
****************************************************

二. 等所有人唔掛住你，你先走得...
　
另一種死後生活，你死咗，要去好似機場候機室嘅地方等，等到在生嘅世界冇人記得你，掛住你，先走得（走去邊？我理解係開展新嘅生命，例如投胎）。呢件事好似好浪漫，死左都有人掛住你。
　
實際上係好大鑊架，「等人唔掛住你」等候區，有好多名人走極都走唔到，歷史人物真係唔得你死，真係「走唔甩」啦今鋪。
　
→ 我即時諗，貝多芬嗰啲，日日都有人播胎教音樂
→ 屈原嗰啲，幾千年來，人人放假一日食糉悼念佢
→ 發明 Bunsen burner 個 Bunsen，只要一日有人讀 science 都唔走得
→ 好似宇宙 GEM，淨係個 weibo 都有幾億 fan 屎，到時真係等到變骨灰都走唔到啦
　
作者最後描述，啲名人開始埋怨點解咁多人掛住自己。

****************************************************
　
今日 FB 好多人話好掛住林保全把叮噹聲，接受唔到其他人再做叮噹，令我諗起呢個死後生活。我好掛住全叔，尤其我咁鐘意技安，成日睇叮噹。我好掛住全叔，但我又唔敢「太掛住全叔」，唔想搞到全叔唔 happy，走得唔安樂。
　
不如喺適當嘅時候，大家好似 frozen 個 Elsa 咁「let it go，let it go」。又或者好似鐘意 iPhone 咁，次次都期待叮噹 2.0，叮噹3.0，而唔好為冇咗叮噹1.0而難過。

****************************************************
　
PS. 今次我犯規，聽到叮噹 2.0 把聲，我就掛住全叔啦。畀啲時間我，等我適應叮噹 2.0，然後畀全叔「全身以退」呀。

（圖為朋友仔PM我，TBB 叮噹畫面，再次多謝你）

（翡翠台截圖）

（原文刊於作者面書專頁）