政改之後，殖民主派於政壇影響力料會漸失，但試問佢哋點會坐以待斃等畀人淘汰？回顧幾個月之前，大中華膠已經寫過文章，宣稱自己當年曾參與皇后碼頭等抗爭，亦算係本土派一份子。殖民主派作為其中一員，相信會使用同一招，喺未來兩個選舉稍為修改政綱，聲稱自己係溫和本土派，爭取選民支持。

但呢一班人又有幾多係投機取巧呢？有見及此，現時有必要提高「本土」嘅標準（當然亦有其他原因，唔單止因為佢哋）。過往只要以守護香港利益為行動綱領，該組織/人士就可以稱作「本土」。去到宜家，呢個 term 已經需要重新定義。有人會列出幾點甚至幾十點，例如支持取回單程證審批權、支持正體字，以此種種界定邊個為「本土」。但咁做只會令人難明白、冇心理解，並留低漏洞，令人容易混水摸魚。

因此，「本土」嘅新定義必須清晰而精簡。「係咪本土？」需要改成另一個問題：「你係香港人定中國人？」回答嘅人唔可以留白，港中之間嘅衝突佢只可以選擇效忠其中一方。若殖民主派有人選擇香港一方，可以界定佢有心轉型，暫時先保持觀察；含糊其辭或者支持中國一方，則一律當作賣港賊，必須摒棄、聲討。

當然，上述嘅標準只係適用於現階段。未來幾年，香港人需要嘅標準係「香港人或華人」（Hongkongese or Chinese）。不過此討論不必急在一時，容後再討論。