（一張圖片讓你秒懂：貧富差距不可能靠教育翻轉，只能不斷階級複製下去）

睇完幅圖，我真係唔知講咩好。的而且確，知識可以扭轉命運，努力同拼搏都可以，但呢啲句子嘅前設係，窮人有一種命運，需要被改變。呢啲叫宿命，甚至叫厄運，「知識改變命運」，呢句說話從來唔會對住有錢人講，有錢已經係佢哋命運，有無知識都唔需要改變。

自己全職幫中學生補習，呢幾年，見識太多富裕家庭，完全無誇張咁講句，有啲學生屋企兩三個廁所加埋，大過我住緊嘅劏房。學費最低嗰個學生，小學一年班，個半鐘我收緊佢二百蚊，二百蚊，有啲人覺得好多，有啲人唔志在。細個嗰陣屋企攞綜援，我好記得，社署畀我每個月嘅返學午飯津貼，正正就係二百蚊，啱啱夠我食十蚊燒味飯，一星期五日，食足四個禮拜。

「咁你而家收咁高人工，咪知識改變命運囉，拿，你話努力讀書幾緊要！」

唔好意思，我真係唔覺得知識可以點樣改變命運，真正改變到命運嘅，嗰啲叫幸運。雖然我唔係出身富貴人家，但好幸運咁原來我對中文有興趣，又好幸運咁，我中學開始無無聊聊不斷睇書，大咗竟然可以將興趣化為職業，都叫搵到食。而我發掘中文嘅過程，都係中一嘅時候因為阿哥借左本金庸，我又無興趣班要上，好無聊好無聊先攞上手睇，一睇就不能自拔。我會諗，如果我出身喺中產家庭，小一已經開始要睇書，話唔定一早就培養到閱讀能力添。

呢幾年補習入面，我感受到咩叫贏在起跑線。好似世紀帝國咁，唔係多你好多，一出場已經五百肉五百木，而自己只係得嗰二百肉二百木。對面搵個正常人嚟玩，就可以輕輕鬆鬆升城，有資源有兵力。當然好勁嘅你，可以憑住技巧同操作，撳到手軟，拉羊殺豬分秒不差，十六分鐘升城，富國強兵。但無咁熟手嗰啲呢？咪等住畀人屠，完場再串你手腳慢，唔謙卑囉。下場再嚟過？唔好意思，生命無take two。

的而且確，命運是對手，人可勝天，但有時呢啲都係粉飾世界嘅美言。相比起逆天，樂天知命可能重要啲。當個社會好努力咁鼓勵你買樓嘅時候，停低諗一諗，四百呎四幅牆，係咪真係自己能力所及，而又想追求嘅嘢？

如果有人出身貧窮，無運氣無際遇，最終只可以喺社會底層掙扎，汗流浹背、辛苦終日而僅足糊口，我除咗可以悲歎天道無情之外，真係唔知講咩好。唉，認命啦。