有人上月去完首爾旅行之後，喺青衣站睇完醫生懷疑感染新沙士依件事，經網上瘋傳之後已經冇咩人唔知。正當大家都話訪韓旅客累街坊嘅時候，有人講咗一句「我未搵夠錢買青衣城喎」。或者你覺得佢冇人性，依個時候仲諗住樓價會跌可以入平貨，但無奈喺一個所謂「正常」嘅香港，你要買樓係天方夜譚。
早前中大研究先話唔食唔住乜都唔用，儲錢買樓都要十四年，仲要未知十四年後個樓市升成點，係咪真係夠畀首期。成日話等經濟樓市泡沫爆破啲樓自然會跌番價，但我真係唔知要等到幾時，反而望新沙士喺香港再爆發好似仲實際。你話咁樣好冇人性好賤格都好，但要喺而家物價樓價高到痴線嘅香港，買到一個「瓦遮頭」仲可以有咩方法？
回望返零三年香港沙士爆發，帶畀我哋嘅除咗係一個個英勇救人嘅醫生護士捨己救人之外，就係樓市大地震。當年淘大花園重災區甚至出現五十五萬嘅成交，對比近期幾個單位大約要四百萬，簡直係差天共地。當年我哋大家喺沙士時期，都只係記得洗手洗手洗手，同埋中招嘅醫生護士可唔可以脫離鬼門關，反而唔係太多人仲有閒情去關注個樓市。但到咗而家咁嘅時勢，當新沙士有機會出現喺香港之際，仲有人先關心樓價係咪會再大跌，並唔係化表佢哋冇人性，一嚟而家香港仲未到上次淪陷嘅地步，按照香港人針唔拮到肉唔知痛嘅習性，除非有香港人因為新沙士而死，唔係嘅話都唔會識驚；二嚟就係證明香港樓市實在太高，高到只要有上車嘅機會，香港人都唔會放過，上車比一切都重要。
就算你再比心機做野，得到老闆賞識升職加薪都好，你一個月份糧可能都只係啱啱好喺香港買一尺甚至半尺地磚。拍拖同居？結婚？你突然覺得同女朋友之後嘅路冇可能行到落去，唔同結咗婚都仲要分開住？排公屋都唔係我哋依班五星香港人可以做嘅事，反正到最後都會畀班新移民甚至係懷仔依類唔合法嘅人搶晒啲單位。
以前啲人會話大個出嚟打工養起頭家，但而家嘅後生出嚟打工連自己都就嚟養唔掂，仲點養得起最少都要四五百萬嘅家？當一個人幾努力都唔可以買到一間屋嘅時候，佢就只能望自己中六合彩頭獎，或者買中今晚德國對美國既半場二比五依個九千倍波膽。如果連橫財運都冇，到咗依個時候真係望新沙士喺香港爆發先有買樓嘅希望。你話我黑心？最起碼我都仲覺得自己比起黑警好囉。
作者個人面書專頁：
https://www.facebook.com/