係，我又「以畫為喻」，用方展博嚟比喻香港本土派。本文有啲長，有心嘅歡迎一讀。如果未睇過香港人神劇《大時代》嘅請先補補課，再嚟讀呢篇文，你就會明我講乜。

劇中方展博一家慘遭丁蟹滅門，其實佢地本來可以逃走、可以縮、可以閃、可以苟且偷生；但方展博無咁做，由以下幾場合可見之：

1. 方家喺恆月樓無安樂茶飯，比黑社會淋紅油，佢同玲姐仲有方婷，齊齊著血紅tee示威；
2. 方敏被唱衰生性病，本來方家買晒火車飛全家逃亡，但方敏死咗之後，阿博第一個搣爛車飛；
3. 龍紀文offer入臺證比方家去臺灣避避，阿博仲係婉拒咗，佢話唔驚死，只係怕死唔去有排煩。

***

其實方展博，就係最好咁示範咗咩叫「身土不二」，面對丁家黑社會嘅進襲，就好似大陸對香港嘅魔爪進擊，香港本土派唔係去籌備著草，而係勇敢面對。

好多人有能力走，正路就係「走為上著」，人類有著生物天性，受危險就係fight or flight，既然唔係flight，點解要違反天性，走去接受敵人嘅上下其手？

===

好多香港人面對中共嘅反應，就係好似方芳咁，兩個字：「驚死」。仲記得一幕，方展博要出街著血tee控訴忠青社，但方芳已經驚死，「做乜要出去惹佢地？咁樣死梗架！唔好去！」

等於今日香港硬係有班人，永遠怕激嬲中共，事事睇中共面色，只有對中共跪安。而事實呢？（左膠最鍾意問：然後呢？）梗係愈嚟愈無啖好食啦！丁蟹邏輯，只會籠罩呢個拜金拜權嘅都市，避得一時就避唔得一世。假如阿博唔係同丁家一拼，可能姑且頂到一排，但方家命運終要同丁家火併。

+++

記得我睇過佛教嘅「衍揚法師」講過，如果一個人未有動力「改變命運」，只可以講佢未受夠苦。呢幾年香港係真正嘅中共黨部治下，急劇敗壞，終於如車公靈簽所言，敗晒身家而回，但苦楚仲未令港人得到領悟，只可以講苦果未修成。就好似，一日未到丁家搵黑社會滅門，一日方家仲係未可以絕地反擊。大部份港人嘅心態就好似方芳咁，以為「唔好惹到班黑社會」就無事，但實情最後仲係要遭到滅頂。

×××

我對香港嘅預後（prognosis），係覺得中共終有一日大開殺戒，香港人先得以真正覺醒。當然，廿幾年前嗰場失眠嘅民主運動，屠夫政權就等於黑社會班人掟晒方家姊妹落街一樣可悲。

而香港人今日要做嘅，唔係再去舔呢個傷口咁簡單，而要去結集實力，同中共嚟一次大攤牌，迫中共走上絕路。呢半年嚟嘅股市大升，絕對有如丁蟹嘅五蟹集團臨「釘蓋」前嘅末日財，大家就應該好好聚集實力，到環球經濟一旦轉向，大奇跡日出現，就足以夾死中共班黑錢，到時就係香港、亦即係本土派嘅方展博翻身之日。

（大時代截圖）