最近滿城熱烈討論的，不是國安法，而家唔知幾時通過嘅《鏡安法》。
大家熱烈討論鏡粉所為，好多人發表啲句界Key評論：其實Mirror冇問題吖，但係鏡粉就橫蠻霸道囉，又話粉絲行為，偶像埋單，鏡粉咁搞會趕客，云云。

但我想唱反調：
我覺得，做粉，就係咁㗎啦！

姜濤在Chill Club頒奬禮訓話其他11名Mirror成員，RubberBand嘅泥鯭於Facebook出Post批評姜濤，指姜濤仲駕勢過修哥攞終身成就奬，直指姜濤精神狀態有問題，叫佢唱好啲歌先搞小動作。
泥鯭因此觸犯《鏡安法》，馬上被鏡粉瘋狂出征圍攻！攻打到RubberBand公開道歉。
大眾鏡粉討論《鏡安法》猛於虎，又指鏡粉野蠻唔講道理，連累偶像，話佢哋嘅野蠻行為，會影響到Mirror形像。
放喺其他明星，這件事或許有討論空間，放在鏡仔身上，說鏡粉影響Mirror則完全講唔通！
要知道，沒有鏡粉沒有鏡仔！Mirror紅到現像級，唔係靠營運，唔係靠全民造星，唔係靠Viu，唔係靠花姐，係完全靠鏡粉出錢出力捧出嚟的！
鏡粉就是靠著野蠻的應援，將Mirror就冇人識，捧到紅透香港，成件事根本係一個奇蹟，而令呢個奇蹟發生，就係鏡粉嘅鬥志、士氣、恒心，你話呢啲係野蠻？咁你就要承認，Mirror就被呢份野蠻育成長大的，這是Mirror的奶水啊！

大家要搞清楚，是鏡粉育成Mirror的，他們不是Makerville捧出來的，因為先有Mirror才有Makerville，所以Makerville才是Mirror捧出來的。Mirror也不是ViuTV，花姐，魯庭暉捧出來的，是鏡粉直接捧出的。

看看Mirror背後的團隊，面對Mirror組團以來最大的衝擊，紅館演唱會冧Mon意外！這個團隊為Mirror做了什麼？
演唱會跌Mon，公司同經理人龜縮，交畀Mirror出嚟面對記者質問，歌手自己頂曬！
舞蹈員阿Mo畀個Mon壓到癱咗，佢女友So Ching終於頂唔順，宣佈退出Collar。
同樣，公司龜縮，經理人企喺旁邊，交畀Collar出嚟面對記者質問，歌手自己頂曬！Makerville整間公司上上下下，冇一個人值得出糧！

Mirror背後所謂的營運團隊，基本上只懂站在Mirror背後。
Mirror能夠依靠的，就是一往無前地喪撐Mirror的鏡粉！
鏡粉沒有大台，有前無後打死罷就，咁自然就係靠追星本能行事㗎啦，一旦有人踩到偶像，粉絲生態自然係群起護仔㗎啦！

因為佢哋勢力大，開始愈來愈多人被踩到，於是有人開始想同鏡粉做切割，咩人會想割蓆？當然係最鍾意割蓆嘅黃絲啦！

鏡粉之亂，各界人士開始討伐鏡粉行徑，其中黃絲最熱烈。
其中一個黃PAGE「懲罰師」提出大哉問：「幾時開始Mirror變成辨別敵我的一把尺？」
因為原來黃店經常被質疑，點解唔Share Mirror嘢？點解貼某個鏡仔海報？點解唔公平撐曬十二子？又會被指控「唔支持後生仔」、「助紂為虐支持對家CCTVB」。

到底幾時變成咁？幾時開始Mirror變成辨別敵我的一把尺？
呢個問題，不如由我嚟答吖：咪就係由你哋乜鳩都要分黃藍嗰一段開始㗎囉！

食店分黃藍，買衫分黃藍，睇戲分黃藍，聽歌分黃藍⋯⋯
既然「撐黃就要撐Mirror」，咁調返轉，自然係「撐Mirror先係撐黃」啦！
鏡粉咁樣要求，一啲錯都冇喎！
「姜濤不紅，天理不容」，呢句口號都係黃絲自己吹奏起來先㗎！既然係天理囉，仲邊有得拗㗎啫！

用追星嘅態度去投入政治社運，當然唔妥當啦！但而家鏡粉追捧偶像咋喎，追星就梗係狂熱㗎啦，有得要求人哋理性追星㗎咩？
前年，中國政府整肅網絡，「整頓網絡『飯圈』現像」，當時曾要求規管網絡粉絲的不理性行為，這是我唯一一次，見到有人要求「理性追星」。
沒想到，兩年時間不到，香港在這方面就追上大陸了，黃絲居然也跟著一起要求「理性追星」了。

相關節目：
【大香港早晨】第2405集：
泥鯭觸犯《鏡安法》慘被出慘被出征，鏡粉野蠻唔講道理？鏡粉就是靠這野蠻道理捧紅鏡仔！

【大香港早晨】第2405集：
So Ching退出Collar！Makerville事不關己繼續龜縮，記者會都要靠歌手去頂！

【大香港早晨】第2406集：
鏡黃之爭！幾時開始Mirror變成辨別敵我的一把尺？咪就係由乜鳩都分黃藍嗰時開始！