武術宗師李小龍先生逝世近四十年，一直以來不少電影、小說、動漫、Game均直接或間接利用他的形象，每套都話自己點崇拜佢、點認真去搵資料，今鋪就同大家講下4月出版的港漫《我是中國人 李小龍》（以下會稱書中主角為「偽小龍」）。
故事講述在西雅圖開武館的偽小龍，因兒時好友林雲飛捲入幫會之爭而失蹤，故前往三藩市救人，出發前編劇不忘找幾個典型的臭串鬼佬畀佢 show off。
抵達後以單挑華美幫首領為放人條件，武痴唐龍不單敗陣，更被一直埋伏的林雲飛刺殺，因為雲飛其實係黑手黨分支福聯幫的爪牙，為組織能在唐人街賣白粉而先要剷除華人勢力。
第二期就單刀直入，講述獲得黑手黨幹部羅禮士初步信任的林雲飛，被交付一單毒品交易，不過就畀身為警察臥底嘅佢通風報信，大受損失的羅禮士聯同手下追殺，最後理所當然地由偽小龍單挑對方。呢場決鬥本應係高潮所在，面對七屆空手道冠軍，以剛烈及速度為主的羅禮士，截拳道應該有好大發揮，可惜偽小龍即係偽小龍，做咗一輪沙包後，忽然變咗王小虎，不斷踢踢踢踢踢就 KO 對手，完全睇唔到「截」咗響邊。然後就係用大量旁白去交代林雲飛原來係黑警，毒品交易啲錢確係畀佢吞咗，最後就係聯同警局老頂將佢繩之於法。之後又輪到更強者凱撒出場，先派人暗殺獄中的林雲飛，再找偽小龍挑戰，理由就係佢本來約戰咗羅禮士，而家要偽小龍代打（屌！！呢個咪當年《格鬥拳王──龍泰》條橋黎嘅？）
平心而論，美術方面絕對係一線水準，人物面相精準，動作亦算紮實，連封面設計都有心思，製作團隊應記一功。但劇本卻寫埋晒啲70年代式中國人打鬼佬故事，本身就已經 out 到爆。而書內除左神化中國武術（唐龍一下鶴咀就令史達林臂骨爆體而出）、鬼佬如何歧視中國人外，就好似無咩好講。
前兩位個目標都是簡單易明，唯獨偽小龍果句最奇卵怪。「做一個有能力影響世界的中國人」聽落相當空洞，首先「有能力影響世界」唔代表係做好事，希特拉、史太林、毛澤東、薩達姆、拉登都係有能力影響世界之輩，但其實都只係混世魔王。呢句話背後意思其實係企圖將個人成就貢獻畀中國，從而「提升中國人形象」，不過呢個諗法係自 high 而已，中國人整體質素如何，根本不在你考慮之列，正如中國運動員喺奧運拎幾多金牌都好，中國人整體健康而言仍是東亞病夫，地位唔會點提升。而成班主角本身係美國人，不論佢土生土長定移民，本身就必然係向美國效忠，喺國籍法上佢哋已經無資格自稱中國人（最起碼中共唔承認雙重國籍），跟手又話香港係佢嘅根，個邏輯其實都幾混亂。只係幾段劇情已暴露此書思維的粗淺，相比之下，林雲飛細個時嘅理想至係最值得尊敬，因為維護法紀本身已經高過嗰啲自 high 理想多多聲。
當本書用李小龍個名、形象、經歷、成就等資料，但又扭曲佢人生觀、價值觀，動機就已經有問題。講白啲，其實就係抄咗電影《龍爭虎鬥》個框及盜用內裡人物，再利用李小龍嘅名氣、武術上嘅成就、大眾對佢嘅感情，寫一個自卑的中國人最愛嘅打鬼佬（打飛機）故事。有得揀的話，我寧願佢用返「序」中提及的已放棄劇本，嗰個穿梭時空的迷離故事點計都更有觀賞價值（雖然都有人話呢條橋有既視感）。
其實幾十年來，中國人都好鍾意利用李小龍來打飛機，自從佢拍咗當年嗰幾套成名作，就成為自卑中國人的救贖。理性上，佢哋心裡明白中國嘅弱小係咎由自取，但情感上接受唔到，於是要搵發洩對象來平衡，幾部電影都係描寫主角面對毒犯、日本皇軍、鬼佬黑幫、野心家，總之就非我族類其心必異，個個都係加害中國人嘅仆街，李小龍戲中就係以打瓜佢哋為己任。本來呢啲低層次意識嘅野應該睇完就算，但中國人真係睇到上晒腦，搞到電影同現實都搞唔清。之後再出現嘅霍元甲、陳真、葉問，其實都係不斷偏離史實去延續呢個李小龍式市場，個個都被寫成民族尊嚴嘅打手，總之就係不斷喺個虛擬世界內搵外國人洩慾。
最慘仲係九成九嘅中國人睇完李小龍之後，都只係沉醉於電影鏡頭，無認真去了解「截拳道」呢門哲學，就胡亂吹捧係咩集中華武術之大成，會去了解佢人生觀嘅更係少之又少。而李小龍本身係美國公民，出生時已經係美國人、成名嗰時係、死咗之後都係（佢葬都葬喺美國的），訪問時問佢係唔係中國人或香港人，人哋都無認過，甚至覺得呢種國族定位太膚淺，所以中國人其實一向都係「痴心錯付」。
以上種種現象暴露出中國人在文化同精神層面上嘅弱點，一來就係太少野可以喺外國人面前自 high 同 sell，二來係佢哋不求甚解的態度，我諗呢啲陋習好難話改就改，不過打飛機都應該要搵個合適對象，希望你哋了解事實後，唔好再搵個美國人做你哋民族英雄（或繼續複製有著他影子的角色）。真心值得崇拜的話，佢喺邊度嘅人都無所謂，唔該咪再亂作亂用，尊重下李小龍先生吧……