二十幾年來，香港人搞嘅所謂民主，不外乎係點燭光，大合唱，拍夜空燭光照，參加六四七一遊行節，選舉時投票畀告急人士等等。呢類集體行動或節日活動，一直以來都係某政黨及其喉舌（包括報章）相互配合下定期催生出嚟。久而久之，港人建立一種對呢班政黨及喉舌嘅依賴，民主概念亦被定型。

如是者，大家嘅鼻子一直被牽住走，過住胡混嘅民主歲月。二十幾年來，偶爾好似曾經「公民覺醒」過，但大家稍稍睜開雙眼，好快就訓返，訓醒就繼續擁抱呢種民主依賴，狀況毫無改變，所謂嘅覺醒原來只係空中樓閣。

直至今年，大學退聯公投終於敲醒胡混嘅民主歲月。大學生摒除政黨及喉舌嘅依賴，從下而上地以直接民主嘅投票及授權方式改變傳統嘅學生代理體制。而今次主導浸大退聯嘅浸大退聯行動組就係最好例子，因為領導行動組嘅事實上只有一位弱不禁風嘅女學生！

大學退聯公投係香港真真正正嘅民主革命，至少佢對港人二十幾年來對民主代理嘅依賴進行咗革命。大學退聯成功後，大學生未來嘅路仍然不明朗及艱鉅，但能夠克服恐懼及承受孤獨，踏出最困難嘅第一步，就已經有面對不明朗前景嘅基礎。

不少香港資深傳媒喉舌都講，退出學聯會令中共非常高興。呢類喉舌年紀通常快將步入老年，改變對佢哋嚟講，可能限於不同退休地點、棺材顏色及物料之間既選擇， 所以家長式嘅指導性思維其實好吻合佢哋嘅年齡及處境。但推動退聯公投嘅大學生不過20來歲，如果你向佢哋提出「退出學聯，然後呢？」嘅問題，佢哋可能會回答你：「40至50年之後你仲有然後嚟話，咪一清二楚囉。」

過去二三十年來不斷點燭光、大合唱、拍夜空燭光照、參加六四七一遊行節嘅港人無法帶來嘅改變，呢班年青人喺短短一年內，以香港前所未有嘅方式做到。如果從對手角度去睇，前者就好似《選戰》裡面嘅何松柏，行事畏首畏尾，思路及底牌早被睇通睇透，而後者就係無畏無懼勇往直前，而且章法未明嘅葉晴。如果你係宋漫山，你面對邊一位會更高興？

（圖片來源：香港城市大學學生會退出學聯關注組）

（本文原載於作者面書）