《明報》前日有單「調查發現27歲或以前入讀MBA，畢業後三年加薪1倍」，呢啲垃圾新聞少啲分析力都會信以為真。根本就係而家啲人，唔知咩叫 association 同 causation，即係「關聯」同「因果」既關係。

用個例子講就明。

啲人成日話：入得醫院住嘅老人死亡率，遠高於係老人院。如果咁樣睇到個「關聯」，就得出個結論為「入醫院住就死快啲」的話，sorry，錯晒，因為咁嘅分析方法係好薄弱，倒果為因。

入得醫院嘅老人，身體已經好虛弱，佢哋已經有個 prerequisite 嘅 conditions：即係呢一班人，已經比起其他人承受緊更大既死亡風險；正所謂，半隻腳踏入咗鬼門關。咁佢地入得醫院，自然係死亡機會比出面大囉。

____________________________

同理，《明報》呢個case，讀得MBA，首先肯肯定係有錢（唔係你點交果幾十萬、甚至過百萬學費啊）。而點解佢哋有錢呢？唔通真係好似百份報啲正能樣故仔咁，「靠自己奮鬥」出嚟咩？佢哋有錢，係因為已經有啲 predisposed successful factors，例如屋企人受過高等教育、身邊叔父姨媽姑爹都係上流社會，有好好嘅人脈，有錢有勢，咁就自然「有基礎」去實現夢想囉。

而正正係呢一班人，本身有呢個基礎，讀完MBA，就好似一部蘋果手機零件，出咗富士康工廠咁，打返個嘜頭咪「成大器」囉。你觀察到有咁既「出品」，就以為係「必屬佳品」嘅話，只係你將事後孔明啫，絕對唔係呢件「出品」成功嘅原因。如果你可以求其喺鴨寮街執啲爛銅爛鐵，拎去富士康，「打造」到新嘅 iPhone，賣到比起會爆炸嘅中興高十倍價錢，咁就叫做「有成功基礎」啦。

問題係，現實嘅富士康，根本就會篩選，只有屬於蘋果嘅零件先會造到 iPhone 囉。同理，你估是但「寒窗苦讀」，就入到MBA？如果全香港 undergrad 都直升MBA，豈不是無廢青？全部大學畢業生起薪點都加薪一倍？唔好玩啦，到時陰報啊、毒果啲肥西人事顧問，仲唔嗱嗱聲發動 spinning 機器，壓低班 fresh grad 人工咩。當然，呢個梗係如果啦，你估真係好似讀 econ 咁，現實真係有條 demand & supply curve 比你拉上拉落咩。

____________________________

香港人最薄弱嘅係分析能力，主流媒體又垃圾，一見「調查」兩個字就仆埋去「報道」一餐，啲人又見到「有報道話乜乜乜喎」又信一餐；我睇到啲咁嘅生態，只可以搖頭嘆息，難怪咁多隻港豬被圈養囉。