清明又過咗一個星期了，我在清明前再次「收野」，收到2014年的第3張請帖。無論我「這剎那在何方」，啲親友都「刮」到我出來請我飲。啲請帖就好似《哈利波特》封入學信咁，啲信會飛入屋，躲也躲不過。

見到清明前收到的呢張帖咁華麗，就知又係一個以 TBB 台慶做藍本的華麗婚禮。《萬千星輝結婚典禮》都有以下的原素，真係如有類同，實屬巧合：

• 首先係張請帖，最近新聞話，現代請帖會隨帖附送新人結婚相，感覺上有野送抵返啲。請帖真係唔洗搞咁多嘢，唔使一打開有音樂，唔使一打開彈 pair 立體新人出來，更加唔使「滴」個律師文件的蠟印封口。我最緊張的其實係張帖冇漏到張餅卡同埋個10蚊回禮利是，張餅卡就好似買日用裝M巾附送嗰片夜用裝咁重要。請帖日期地址印錯唔緊要，pair 人個名錯咗我亦唔在乎，反正 Facebook 一個月前就會不停倒數 remind 我。
• 然後就係擺酒「播放生平」環節，我真係無興趣睇你結婚相，因為真係同真人唔同哂樣。點解而家冇咗玩新郎新娘環節，我最想睇你地尷尬到不行的樣，還返個玩新人機會比我哋。
• 點解擺酒要有天才表演環節，細個個時懇親日（撼親日）仲表演唔夠呀？每次表演，我都好想大叫：「留返公司 annual dinner 嗰時表演啦你。」
• 再來就是無窮無盡的換衫，點解每一個菜式新娘都要換一套衫，枱面個菜單其實係咪你啲衫啲名，套紅運乳豬係 for 進場，套美點雙暉係 for 送客的。而且套套衫都好似問《我和春天有個約會》個麗花皇宮借返來咁樣。
• 點解個結婚蛋糕幾層高，都唔見切完有得比我地食。如果有得食返，個蛋糕可唔可以好似中式茶樓個鴛鴦炒飯咁，一半係朱古力脆脆，一半係芒果繽紛？

報紙寫一個標準的《萬千星輝結婚典禮》要30萬，如果你有30萬又唔買樓，如其擺酒，不如捐比東華啦。Pair 新人上電視移交大支票，一定難忘過擺酒。東華當日 pair 新人照舊可以去 TBB 服裝間揀返件飲衫，著到鬼火咁靚上台。汪阿姐會透過東華個節目，宣佈 pair 新人決定將結婚個30萬捐出去；話埋畀香港，華南地區，以至歐美，澳加所有親戚知你哋結婚單嘢。親友想畀人情咪打100條線捐埋畀東華囉。當晚仲可以安排「卡啦之星」唱歌比 pair 新人贈慶。TBB 同東華不如考慮下呢個套餐，有意義過擺酒，唔止親友會祝福你，受益人都會祝福你。

P.S. 當我正在埋怨啲請帖好似 M come 咁，月月都來的時候，我爸叫我好好珍惜朋友仔個個年輕，喜事重重的日子，個個月收到請帖並不可怕，老的時候，月月收到「白色的」才可怕。


（本文原載於作者面書專頁）