長假期前講過要改過自新，唔好再喺屋企搲腳指。過完呢個假期，我發覺我係患有「冇啦啦有五日假期，唔知可以去邊」焦慮症，有呢個焦慮症有兩個成因。
　
一‧ 我同一般香港人一樣，除咗做嘢同讀書，係冇任何嗜好架
抗拒copy and paste嘅生活，但其實我又冇咩想做。我試過寫日記，後來發覺只需要每日寫「同上」就完事。
　
二‧ People Mountain People Sea
根據香港假期守則，「去邊都好，唔好留喺香港」，今年復活節即使再打破外遊人次記錄，香港依然周街都係人。太多人玩，好玩都變唔好玩。就好似見到樓下公園條瀡滑梯咁多人瀡，排幾個字先瀡到一次，就會打消玩嘅念頭。最後又秉承傳統，學耶穌咁，昏睡3日，過完假期復出回歸工作。
----------------------------------------------------------------------
　
可恨嘅係，唔只我有「冇啦啦有五日假期，唔知可以去邊」焦慮症...
　
復活節有幾萬人排隊入長洲，排到好似輪候公屋咁長龍。香港人冇嘢做到一個地步，排個幾鐘入長洲，同人迫下都好過喺屋企不事生產，香港人要歡度假期，真係談何容易。

----------------------------------------------------------------------
　
「的起心肝出街之旅」
尋日我終於的起心肝出街，同朋友仔去沙田踩單車，真係令我感受良多。
　
--> 沙田往大埔嘅單車徑，係同星期一至五嘅紅隧咁逼人，你永遠都打破唔到周街都係人嘅縮命。同港鐵一樣，由於「前面嘅列車尚未開出」，大部份時間都唔係踩單車，係坐喺單車上排隊。
　
--> 條單車徑成功由公路賽變咗障礙賽。由於係好似東非動物大遷徙咁多人，真係險象環生，落斜時，不停聽到後面太多人而炒車。
　
--> 即使有黃金寶嘅技術，都難以發揮所長。情形就好似你揸住架林寶堅尼過紅隧，得物無所用，你架車幾快都要排隊。沿路好多家長打算教細路踩單車，但車來車往，只會學到「睇車」呢個技巧。
　
--> 踩單車呢個假日節目，成為商人謀利嘅時機。朋友仔上星期六喺同一間單車舖租車係30蚊，尋日係80蚊，深深令人體會咩係坐地起價。沿路聽到有個靚仔因為太多人，同朋友仔失散咗，我又聽到佢打電話同朋友仔講：「去咗邊呀你？啱啱我經過個間呃錢小食亭囉」，連細路都覺得比人呃。
　
--> 最難忘都莫過於「火舞黃沙」嘅路線，沙田往大埔，途經吐露港公路，馬場臭屎區，地產商未起好豪宅，處處都沙塵滾滾。最後我因為吸入太多沙塵，鼻敏感發作，返屋企食藥先好返啲。
----------------------------------------------------------------------
　
香港已經沒趣到一個地步，影到相就係一個景點了...
　
我個「的起心肝出街之旅」，尾站係返中大未圓湖賞月，睇呢期好 hit 嘅「鏡花水月」。縱使被外界形容到幾詩情畫意，見到一群又一群嘅人，「對你拍不完」咁影個月亮，就覺得好無癮。
　
除咗睇「鏡花水月」，我仲去和聲書院食 waffle，和聲書院 cafe 望出去，會見到李嘉誠座觀音。當我見到一家四口，捧住個 waffle，同遠方嘅觀音合照，我真係覺得香港可悲又好笑。
----------------------------------------------------------------------
　
香港多人到，連氧氣都唔夠分啦就來...
　
平日返工搭地鐵，總覺得自己係冒險樂園推銀機嘅硬幣，每個站都俾新嘅硬幣推我，去到金鐘架地鐵就好似食咗 bb 整腸丸咁，瀉返啲人出來。假期打算出街玩，又 people mountain people sea，香港承受到更多遊客？到底將來香港會唔會出現大陸泳池，成池都係人嘅景象？