「血濃於水，本是同根生」，呢類說話係土共特區傀儡出賣港人利益時候最喜歡講嘅。

上上一代嘅從鄉下落嚟，深受感召，無可厚非；但係今時今日仲有一堆戰後係香港土生土長，甚至新生代的大中華膠／港豬擁抱呢類說話，話要包容包容，互相融合，真係十級奇怪。無錯，香港人大部分祖先都係大陸落嚟，咁又如何？英國從1707年合併三百幾年，到蘇格蘭人要公投獨立，英格蘭人有同佢哋講 blood is bloody thicker than water 嗎？美國白人的祖先多數係英倫人或德國人，你有無聽過佢哋俾人問點解唔返去偉大祖國母親身邊？佢哋會唔會俾英國人問點解唔認自己做英國人，又或者要叫自己做英國美國人？人哋隔咗個大西洋，我哋隔咗條深圳河，但係呢個差距唔係用實質距離可以量度。一個城市，一百幾年前同一河之隔的另一方發展出唔同嘅文化、制度、認同，真係咁血濃於水？不如大家都尋根尋到底，返去幾十萬年前嘅非洲，全世界一家親？

歷史從來只有強權無親情。俄羅斯同烏克蘭喺歷史上嘅淵源，絕對強於香港同中國，而家俄佬有同烏克蘭血濃於水嗎？說什麼香港自古以來是中國不可分割的部分，又唔見你去同伊朗講花喇子模國是中國不可分割的部分？血濃於水，蒙古不是等於中國嗎？講真，以中國之大，吞併香港之小，易如反掌。你學俄佬光復 Crimea，二話不說開坦克入來，我無嘢好講，因為歷史真係從來只有強權，亦都唔需要講乜自古以來是XXX不可分割的部分。講講本是同根生，就呃到大部份人三十幾年，中共比起俄佬真係青出於藍。

講開 Crimea，其實俄羅斯只係喺1783年由鄂圖曼帝國手上搶過嚟，咁 Crimea 啲土耳其人（史稱 Crimean Tartars）去晒邊？無錯，俄羅斯之後大舉殖民，到史太林將佢哋大舉遷移到西伯利亞，咁剩餘嘅就變係 Crimea 嘅少數民族。人口換血，不是正在我城發生嗎？你問我，香港會否奇跡咁好似一啲東歐小國咁最終安然生存，我唔知道。但係，如果大部份人仲係相信「血濃於水，本是同根生」啲大話，好快就連自己都會被連根拔起。你可以有千百個理由反對香港獨立或者進一步自治，但係你用「本是同根生，血濃於水」呢啲垃圾理由，唔該你收皮。

（本文原載於本土文集）