如果要形容深水埗散發出黎嘅氣息，相信大家都會認同個種就係「窮」嘅氣息。我作為一個資深窮撚，我身上窮撚嘅氣息係從小培養，至今依然揮之不去。四年班之前，我都住喺深水埗嘅。

________________________________

窮人自有生存之道，無咩錢都可以活得招積，今日講下深水埗嘅衣食住行。

作為深水埗潮童，我極具時尚觸覺，個頭我係去「不拍烏蠅髮型屋」剪嘅，鞋喺「步陞」買嘅。冇馬雲淘寶嘅年代，衫就喺北河街搜購嘅，冒牌卡通衫嗰度啲款最新最齊，經典嘅還珠格格熨畫衫我都有買，仲有威盡全班嘅為食龍少爺書包都喺北河街買嘅。

譚仔同松記未進駐十八區前，深水埗街坊一早就知佢哋係好野。維記嘅嘔（牛）)通，公和嘅煎釀豆腐，打出來我都已經流口水。當然唔少得揚名國際嘅名將壽司。我呢啲膽色過人嘅細路，當年我久咳未清，喺深水埗啪左兩粒蛇膽，真係堅過珮夫人，如果唔係我當年真係咳到塊膶都保唔住。

住喺深水埗嗰段日子，我住嗰幢舊樓經常停電，曾經世界盃決賽停電，全人類鼓譟，又曾經宮雪花選亞姐宣布賽果嗰時停電，我同阿爸跑咗8層樓梯，衝落電器舖睇賽果。

以前，我覺得住喺麗閣邨嘅人最有福氣，佢個公園真係好好玩，而且唔係自私會所，人人都玩得。我地一班細路玩得好文明，鞦韆每人只可以fing五十下。我第一次坐監就係喺深水埗嘅小童群益會，有機會玩大富翁，就算不停坐監我都好快樂。

________________________________

住喺深水埗嗰份快樂莫過於我知我窮，但我深明「睇餸食飯」嘅道理，我哋冇搲著數要人道救援，我哋都自力更生。

________________________________

奈何深水埗已經不一樣了……

點解提返起深水埗嘅事，話說就黎過年，食環署表明嚴打違法嘅桂林夜市，呢件事真係「好做唔做，年三十晚謝灶」。其實好多野都係犯法架，北河街嘅冒牌卡通衫係唔係侵權？名將壽司係唔係合乎食物安全？舊樓搶電有冇人處理？我知實有人話，打擊違法夜市係天經地義，我只想提出點解香港政府對於窮撚地區嘅執法係特別賣力？

食環署其中一個職責係保持香港清潔，對公眾地方潔淨違例事項進行執法，咁水貨客隨處棄置紙皮箱，自由行隨地吐痰同自由行細路糞便弄污街道點解唔嚴厲執法？

邊個贊成新年期間食環署人手應該全面派去自由行重災區執法，去拉自由行嘅請舉手？違例就要執法，咁執法都要按嚴重性而有先後次序啩。

點解而家成日要選擇性執法，令我哋班窮撚唔開心？

新年擺檔係基層小販搵食嘅機會，點解一年流流長，食環署唔執法拉自由行弄污街道，新年個幾日又咁落力拉小販？係唔係食環署新年有雙工？

________________________________

P.S. 四叔收購海壇街舊樓重建成豪宅，係唔係好荒謬？當深水埗區都變成豪宅區嘅時候，大家又係時候迎接深水埗都住唔起，窮到訓街嘅年代啦。