被指最有機會變節支持政改方案的公民黨湯家驊，早前曾提出如果北京承諾2020年取消立法會功能組別，以及2022年降低特首候選人出閘門檻的話，就會考慮支持政改方案。他今早（2月1日）出席無綫新聞《講清講楚》節目時，感嘆立法會現時沒有溫和派，又批評泛民沒有政治智慧，並認為他「袋住先」的條件合理，認為北京和建制派有機會接受。

已被不少反對派視為陌路人的湯家驊，在節目中就猛烈批評「同路人」：「而家立法會係冇溫和派，民主派真係冇乜邊一個係可以講係適合從政，冇乜政治智慧，因為有時有啲嘢，就算你嘅決心係好強，你都唔會將佢講得咁死，我如果爭取唔到普選特首，我退而求其次，我爭取一個真正嘅普選立法會。與其話用輿論去迫泛民主派投贊成票，不如喺呢一刻，用輿論去迫民主派返回談判桌上。」湯家驊又指政改非口舌之爭，不斷批評北京不可信及邪惡，都無助政制向前走。

湯家驊認為，2017政改方案一旦通過後，再要求2020普選立法會亦非強人所難：「你話有普選特首之後，就可以普選立法會丫嘛，咁而家你真係過咗喇，喺你定義之中2017係普選特首，我哋認為唔係，你認為係，無問題，我就係當你講得啱，咁你過咗喇，咁你2020仲唔係普選立法會？咁所以呢，我覺得，我提出呢個要求絕對唔係強人所難。」

被問及建制派未必接受取消功能組別，湯家驊就認為如果北京首肯，不知道建制派還要怕甚麼，湯家驊指建制派有資源，又不乏有政治明星，要當選並不困難，他又指建制派已經得到了廿多年甜頭，現在同其他人競爭是很公平。

（翡翠台截圖）